ട്രോളുകളേറ്റു വാങ്ങി കണ്ണന്താനം ഉറങ്ങുന്നു; വൈറലായി കണ്ണന്താനം സ്ലീപ് ചലഞ്ച്

പ്രളയക്കെടുതിയ്ക്ക് ഒറ്റക്കെട്ടായി നിന്ന സോഷ്യൽ മീഡിയയിൽ ഇപ്പോൾ അൽഫോൻസ് കണ്ണന്താനമാണ് സ്റ്റാര്‍. ദുരിതാശ്വാസ ക്യാമ്പിൽ കിടന്നുറങ്ങുന്ന ചിത്രം ഫേസ്ബുക്കിൽ പോസ്റ്റ് ചെയ്തതോടെ കണ്ണന്താനത്തെ ട്രോളുകൾ കൊണ്ട് പൊതിയുകയാണ്. ചങ്ങനാശ്ശേരി എസ്.ബി ഹൈസ്കൂളിലെ ദുരിതാശ്വാസ ക്യാമ്പിൽ കിടന്നുറങ്ങാൻ തീരുമാനിച്ചെന്ന കുറിപ്പോടെയാണ് കണ്ണന്താനം ഉറങ്ങുന്ന ചിത്രങ്ങൾ ഫേസ്ബുക്കിൽ രാത്രിയോടെ പങ്കുവെച്ചത്.


സാര്‍ ഉറങ്ങുമ്പോള്‍ സാര്‍ അറിയാതെ സാറിന്‍റെ ഫോട്ടോയെടുത്ത് സാറിന്‍റെ പേജില്‍ ആരോ പോസ്റ്റ് ചെയ്തതാണോ എന്നാണ് സോഷ്യൽ മീഡിയയിലെ വൈറൽ കമൻ്റ്. ഉറക്കത്തിൽ എഴുന്നേറ്റ് നടക്കുന്ന സോമനാംബുലിസത്തെ കുറിച്ച് കേട്ടിട്ടുണ്ട്, എന്നാല്‍ ഉറക്കത്തിൽ ഫേസ് ബുക്ക് പോസ്റ്റിടുന്ന ഒരു വെർഷൻ ഇതാദ്യമാണെന്നും ചില വിരുതന്മാര്‍ പറഞ്ഞു.



കണ്ണന്താനത്തിൻ്റെ ദുരിതാശ്വാസ ക്യാമ്പിലെ ഉറക്കം സമൂഹ മാധ്യമങ്ങളിൽ വൈറലായതോടെ #KannanthanamSleepChallenge എന്ന ഹാഷ് ടാഗോടെ ഒട്ടേറെ പേര്‍ തങ്ങള്‍ ഉറങ്ങുന്ന ചിത്രം പങ്ക് വെയ്ക്കുന്നുമുണ്ട്. ദുരിതാശ്വാസ ക്യാമ്പിൽ കഴിയുന്നവര്‍ക്ക് ഉറക്കം പോലും വെടിഞ്ഞ് കാവൽ നിൽക്കുന്ന സ്നേഹനിധികളായ മനുഷ്യരുള്ള ക്യാമ്പിലാണ് ഓരോ വേഷം കെട്ടലുമായി ഓരോരുത്തര്‍ വന്നിരിക്കുന്നതെന്നും ചിലര്‍ പറയുന്നു.