കൈയ്യിൽ മുറിവേറ്റ കൂട്ടുകാരന് ചോറ് വാരിക്കൊടുത്ത് നോയൽ

കോട്ടയം: സ്കൂളിലെ അധ്യാപിക പകര്‍ത്തിയ ഒരു ചിത്രം ഇപ്പോള്‍ സോഷ്യൽ മീഡിയയിൽ വൈറലായിരിക്കുകയാണ്. കൈകള്‍ക്ക് മുറിവേറ്റ ഒരു കുട്ടിക്ക് ചോറ് വാരിക്കൊടുക്കുന്ന അവന്‍റെ കൂട്ടുകാരന്‍റെ ചിത്രമാണിത്. ഒന്നാംക്ലാസ്സുകാരായ അഭിനന്ദ്, നോയല്‍ എന്നീ രണ്ട് കൂട്ടുകാരാണ് താരങ്ങള്‍. ഏറ്റുമാനൂര്‍ കാട്ടാത്തിയിൽ ആര്‍എസ്‍ഡബ്ലു ഗവ.എൽപി സ്കൂളിലാണ് സംഭവം.

ഉച്ചയ്ക്ക് ഭക്ഷണസമയത്ത് ഇരുവരും ഒന്നിച്ചു ഭക്ഷണം കഴിക്കാനിരുന്നതാണ്. അപ്പോഴാണ് വലതു കയ്യിലേറ്റ മുറിവ് കാരണം അസഹനീയ വേദനയുള്ളതിനാൽ അഭിനന്ദ് ഭക്ഷണം കഴിക്കാനാകാതെ വിഷമിച്ചിരിക്കുന്നത് നോയൽ കണ്ടത്. ഒന്നും നോക്കാതെ അവൻ തന്‍റെ പാത്രം മാറ്റിവച്ച് കുട്ടുകാരനു ചോറു വാരിക്കൊടുത്തു. അഭിനന്ദിന്റെ വയര്‍ നിറച്ച ശേഷമാണ് നോയൽ ഭക്ഷണം കഴിച്ചത്.

സ്കൂളിലെ പ്രീ പ്രൈമറി വിഭാഗത്തിലെ അധ്യാപികയായ ജെസി ഷാജിയാണ് ഉടൻ തന്‍റെ മൊബൈലിൽ ഈ ചിത്രം പകര്‍ത്തിയത്. ഇപ്പോഴത്തെ കുട്ടികളുടെയിടയിൽ കാണാത്ത ഒരു കാര്യം കണ്ടപ്പോള്‍ പെട്ടെന്ന് ചിത്രമെടുക്കുകയാണെന്നാണ് ഇവര്‍ ഈ ചിത്രം നൽകിയപ്പോള്‍ പറഞ്ഞിരിക്കുന്നത്. മനോരമയുടെ കോട്ടയം ബ്യൂറോ റിപ്പോര്‍ട്ടര്‍ വഴിയാണ് ഈ ചിത്രം പുറംലോകം കണ്ടത്. നോയൽ, പെയിന്റിങ് തൊഴിലാളിയായ തടത്തില്‍ ജയിംസിന്റെയും അനുവിന്റെയും മകനാണ്. ഫോട്ടോഗ്രഫറായ അനീഷും ജയന്തിയുമാണ് അഭിനന്ദിന്‍റെ അച്ഛനും അമ്മയും.