ബി.കോമിന് ഫിസിക്സും കണക്കും പഠിച്ച എം.എല്‍.എ പുലിവാലു പിടിച്ചു

ഹൈദരാബാദ്: ബി.കോമിന് താന്‍ ഫിസിക്സും കണക്കും പഠിച്ചിട്ടുണ്ടെന്ന അവകാശവാദവുമായെത്തിയ ആന്ധ്ര എം.എല്‍.എയ്ക്ക് സോഷ്യല്‍ മീഡിയയില്‍ പരിഹാസവര്‍ഷം. വെസ്റ്റ് വിജയവാഡ എം.എല്‍.എയും ടിഡിപി നേതാവുമായ ജലീല്‍ ഖാന്‍ ആണ് പുലിവാലു പിടിച്ചത്.

ഒരു ടി.വി ചാനലിന് നല്‍കിയ അഭിമുഖത്തിലാണ് ഖാന്‍ തന്‍റെ വിദ്യാഭ്യാസയോഗ്യതയെപ്പറ്റി വെളിപ്പെടുത്തിയത്. ഒരു ചാര്‍ട്ടേഡ് അക്കൗണ്ടന്‍റ് ആകാന്‍ ആഗ്രഹിച്ചിരുന്ന താന്‍ ഫിസിക്സിനോടും കണക്കിനോടുമുള്ള താല്‍പര്യംകൊണ്ടാണ് ബി.കോം തെരഞ്ഞെടുത്തതെന്നായിരുന്നു ഖാന്‍റെ വാദം. അക്കൗണ്ട് എന്നുപറഞ്ഞാല്‍ത്തന്നെ ഫിസിക്സും കണക്കും ആണെന്നുപറഞ്ഞ എം.എല്‍.എയെ റിപ്പോര്‍ട്ടര്‍ തിരുത്താന്‍ ശ്രമിച്ചെങ്കിലും ഖാന്‍ വിട്ടുകൊടുത്തില്ല. റിപ്പോര്‍ട്ടര്‍ക്ക് ഓര്‍മപ്പിശക് സംഭവിച്ചതാകാം എന്നായിരുന്നു മറുപടി.

ഖാന്‍ തന്‍റെ ഫെയ്സ്ബുക്ക് പേജില്‍ വീഡിയോ പോസ്റ്റ് ചെയ്തതോടെ സംഗതി വൈറലായി. എം.എല്‍.എയെ കളിയാക്കിക്കൊണ്ടുള്ള നിരവധി കമന്‍റുകളും ട്രോളുകളുമാണ് ഇപ്പോള്‍ പ്രചരിക്കുന്നത്.



West Vijayawada MLA Jaleel Khan claimed that he had studied Physics and Mathematics for his B.om degree.