കടിച്ച പാമ്പിനേയും തൂക്കിയെടുത്ത് സ്ത്രീ ആസ്പത്രിയില്‍

അങ്കോള (ഉത്തര കന്നഡ): തന്നെ കടിച്ച പാമ്പിനെക്കൂടി പിടികൂടി ആശുപത്രിയിലെത്തിയ സ്ത്രീ കൗതുകമായി. കര്‍ണാടകയിലെ അങ്കോള ഗ്രാമസ്വദേിനിയായ ലീലാവതിയാണ് ഇത്തരത്തില്‍ കൗതുകം സൃഷ്ടിച്ചത്. കടിച്ചത് വിഷമുള്ള പാമ്പാണോ അല്ലയോ എന്ന് ഉറപ്പു വരുത്താനായാണ് അതിനെക്കൂടി കൊണ്ടു വന്നതെന്നാണ് ലീലാവതി പറയുന്നത്.

പാടത്ത് പണിയെടുക്കുന്നതിനിടയിലാണ് ലീലാവതിയെ പാമ്പ് കടിച്ചത്. കടിച്ച പാമ്പിനെ വെറതേ വിട്ടാല്‍ വിഷം ശരീരത്തില്‍ വേഗം വ്യാപിക്കും എന്ന വിശ്വാസമാണ് മുഖവും ശരീരവും നീര് വന്ന് വീര്‍ത്തിട്ടും വേദന വകവെയ്ക്കാതെ പാമ്പിനെ തെരഞ്ഞു പിടിക്കാൻ ഇവരെ പ്രേരിപ്പിച്ചത്. കിട്ടിയ ഉടന്‍ അതിനെ ഒരു ബാഗിലിട്ട് നേരെ ആശുപത്രിയിലേക്ക് എത്തുകയായിരുന്നു.

ജീവനക്കാര്‍ എത്ര പറഞ്ഞിട്ടും പാമ്പിനെ വിടാന്‍ ലീലാവതി തയ്യാറായില്ല. വിട്ടാല്‍ ശരീരത്തില്‍ വിഷം വ്യാപിക്കുമെന്ന് പഴമക്കാരുടെ വിശ്വാസത്തില്‍ മുറകെപ്പിടിച്ചിരുന്ന ലീലാവതി ആശുപത്രി ജീവനക്കാരെ കുഴക്കി. ഒടുവില്‍ ആശുപത്രി അധികൃതര്‍ പോലീസില്‍ അറിയിച്ച് പോലീസ് സാന്നിദ്ധ്യത്തിലാണ് ലീലാവതിയേയും പാമ്പിനെയും പരിശോധിച്ചത്. പാമ്പ് വിഷമുള്ളതാണെന്ന് കണ്ടെത്തിയതിനെത്തുടര്‍ന്ന് കൃത്യമായ മരുന്നു നല്‍കുകയും ചെയ്തു. ലീലാവതി അപകട നില തരണം ചെയ്തുവെന്ന് ആശുപത്രി അറിയിച്ചു.


കടപ്പാട്: വിജയ് കർണാടക