കാനഡയിലെ മുടി ഐസാക്കും മത്സരം വൈറൽ

കാനഡയിൽ മുടി ഐസാക്കുന്ന മത്സരം നടക്കുന്ന സമയമാണിത്. കാനഡയിലെ യുക്കോൺ ടെറിട്ടറിയിലാണ് ഈ വ്യത്യസ്തമായ മത്സരം നടക്കുന്നത്. താക്കിനി ഹോട്ടലിലെ ചൂടുള്ള നീന്തൽകുളങ്ങളിലാണ് ഈ പ്രത്യേക മത്സരം. ഇന്‍റര്‍നാഷണൽ ഹെയര്‍ ഫ്രീസിങ്ങ് കോൺടെസ്റ്റ് എന്നാണ് മത്സരത്തിന്‍റെ ഔദ്യോഗിക നാമം. യൂക്കോൺ ഭാഗത്ത് -20 ഡിഗ്രിയിലാണ് ഇപ്പോള്‍ തണുപ്പുള്ളത്. ചൂടുള്ള നീന്തൽ കുളത്തിൽ മുങ്ങി കുളിച്ച് പൊങ്ങുന്ന മാത്രയിൽ ഏവരുടേയും മുടി തണുത്തുറഞ്ഞിരിക്കും. അതാണ് ഈ മത്സരത്തിന്‍റെ പ്രത്യേകത. ഏറ്റവും വ്യത്യസ്തമായതും മനോഹരമായതുമായ രീതിയിൽ മുടി തണുത്തുറഞ്ഞ് നിര്‍ത്തുന്നവര്‍ക്കാണ് സമ്മാനം.

2011 മുതലാണ് ഈ മത്സരം നടന്നുതുടങ്ങിയത്. ശൈത്യകാലമത്സരമായാണ് ഈ ഇനം നടന്നുവരുന്നത്. ഇപ്പോള്‍ ഈ മത്സരത്തിനായി ലോകത്തിന്‍റെ വിവിധ ഭാഗങ്ങളിൽ നിന്നായി നിരവധിപേരാണ് എത്തിച്ചേര്‍ന്നുകൊണ്ടിരിക്കുന്നത്. തണുത്തുറഞ്ഞ മുടിയുമായുള്ള സെൽഫികളും ചിത്രങ്ങളും പരിഗണിച്ച് മാര്‍ച്ചിലാണ് സമ്മാനം ലഭിച്ചവരെ പ്രഖ്യാപിക്കുന്നത്.

പുരുഷന്മാര്‍ക്കും സ്ത്രീകള്‍ക്കും പ്രത്യേകം പ്രത്യേകം സമ്മാനമുണ്ട്. ഏറ്റവും ക്രിയേറ്റീവായ മുടിക്കും ബെസ്റ്റ് ഗ്രൂപ്പിനും സമ്മാനമുണ്ട്. യുക്കോണിൽ താപനില രാവിലെ 13 ഡിഗ്രിയും രാത്രി മൈനസ് 22 വരെയുമാകാറുണ്ട്. അതിനാൽ തന്നെ രാത്രിയിലാണ് മത്സരം. താക്കിനിയിലുള്ള നീന്തൽകുളങ്ങളിൽ 36 നും 42 നും ഇടയിൽ താപനില ക്രമീകരിച്ചുവച്ചിരിക്കും. അങ്ങനെയാണ് മത്സരം നടത്തുന്നത്.

ഇത്തരത്തിൽ മുടി തണുത്തുറഞ്ഞ രീതിയിൽ ഐസാക്കുന്നത് മുടിയുടെ ബലം കൂട്ടുമെന്നും പറയപ്പെടുന്നുണ്ട്. അതിനാൽ തന്നെ ഈ മത്സരത്തിന് ആരാധകരേറെയാണ്.