കർഷക ദിനാശംസകൾ നേർന്ന് മുഖ്യമന്ത്രി

തിരുവനന്തപുരം: പൊന്നിൻ ചിങ്ങത്തിൽ മലയാളികൾക്ക് കർഷകദിനാശംസകൾ നേർന്ന് മുഖ്യമന്ത്രി പിണറായി വിജയൻ. കാർഷികമേഖലയുടെ പുനരുജ്ജീവനം സർക്കാരിൻറെ പ്രധാന പരിഗണനകളിലൊന്നാണെന്ന് അദ്ദേഹം ഫേസ്ബുക്കിൽ കുറിച്ചു.

കാർഷിക സമൃദ്ധി സമഗ്ര വികസനത്തിൻറെ അടിസ്ഥാനമാണ്. കര്‍ഷകരുടെ അദ്ധ്വാനഫലമാണ് നമ്മുടെയെല്ലാവരുടെയും ആഹാരം. മുന്‍കാലങ്ങളില്‍ നിന്ന് വ്യത്യസ്തമായി കർഷകർക്ക് ആസിയാന്‍ പോലെയുള്ള കരാറുകളെയും കരാര്‍കൃഷി സമ്പ്രദായങ്ങളെയും മോണ്‍സാന്റോ പോലെയുള്ള ബഹുരാഷ്ട്ര കോര്‍പറേറ്റുകളെയും വരെ ഭയക്കേണ്ട അവസ്ഥയാണുള്ളത്.

കര്‍ഷകരുടെയും കര്‍ഷകത്തൊഴിലാളികളുടെയും ക്ഷേമം കൂടി ഉറപ്പാക്കിയാലേ സാമൂഹികവികസനം സമഗ്രതയിലേക്ക് എത്തുകയുള്ളൂവെന്നും അദ്ദേഹം പറഞ്ഞു. കര്‍ഷകര്‍ നടത്തുന്ന ഈ സാമൂഹിക സേവനത്തിന്റെ പ്രാധാന്യത്തെ അംഗീകരിക്കേണ്ടതുണ്ട്. മണ്ണിൽ പണിയെടുക്കുന്ന ഓരോ മനുഷ്യനെയും അഭിവാദ്യം ചെയ്യുന്നതായും മുഖ്യമന്ത്രി കൂട്ടിച്ചേർത്തു.

.