സിനിമ തുടങ്ങും മുമ്പുള്ള 'ദ്രാവിഡിന്‍റെ ഉപദേശം' ഇനിയില്ല

കൊച്ചി: ഇനിയില്ല ആ ഉപദേശം. കുറച്ചുനാളുകളായി തിയേറ്ററുകളില്‍ സിനിമ കാണാന്‍ പോകുമ്പോള്‍ നാം ആദ്യം കണ്ടിരുന്ന പരസ്യം ഇതായിരുന്നു. ജനഗണമന കഴിഞ്ഞാലുടൻ പുകയിലക്കെതിരെയുള്ള സന്ദേശവുമായി മുൻ ക്രിക്കറ്റ് താരം രാഹുല്‍ ദ്രാവിഡിന്‍റെ പരസ്യം ഏറെ ഹിറ്റായിരുന്നു. എന്നാൽ പുതിയ പരസ്യത്തിനായി വഴിമാറുകയാണ് വൻമതിലിന്‍റെ പരസ്യം.

പരസ്യത്തിന്‍റെ മലയാളം തര്‍ജ്ജമയിൽ എന്തൊരു കഷ്ടമാണ്, പുകയിലക്കെതിരെ നമുക്കൊരു വന്‍മതിലുയര്‍ത്താം എന്നിവ ഏറെ ശ്രദ്ധ നേടിയ വാചകങ്ങളായിരുന്നു. കേന്ദ്ര ആരോഗ്യമന്ത്രാലയവും മലിനീകരണ നിയന്ത്രണ ബോര്‍ഡും ചേര്‍ന്നുള്ള പുകയില വിരുദ്ധ പ്രവര്‍ത്തനങ്ങളുടെ ഭാഗമായി അവതരിപ്പിച്ച രാഹുല്‍ ദ്രാവിഡിന്‍റെ ഈ ബോധവല്‍കരണ പരസ്യം ഡിസംബര്‍ ഒന്നു മുതല്‍ തിയേറ്ററുകളില്‍ പ്രദര്‍ശനമുണ്ടാവില്ല.

ഇതിനുപകരമായി ഡിസംബര്‍ ഒന്നു മുതല്‍ പുതിയ പരസ്യങ്ങള്‍ പ്രദര്‍ശിപ്പിക്കുമെന്നാണ് കേന്ദ്ര ആരോഗ്യ മന്ത്രാലയത്തിന്‍റെ തീരുമാനം.