'കറുപ്പ് ദൈവികമാണ്'; കാഴ്ചപ്പാടുകളെ വെല്ലുവിളിച്ച് ഫോട്ടോഗ്രാഫര്‍മാർ

ദൈവങ്ങളെ പറ്റി ഇന്ത്യൻ ജനതയുടെ കാഴ്ചപ്പാട് എന്നും സവര്‍ണ്ണമാണ്. അതേപറ്റി ഒട്ടേറെ എഴുത്തുകളും ഇവിടെയുണ്ടായിട്ടുണ്ട്. മഹാഭാരതവും രാമായണവും അടങ്ങുന്ന പുരാണ കഥകളിലെ ഇതിഹാസ കഥാപാത്രങ്ങൾ രാജാ രവി വര്‍മയുടെ കരവിരുതിൽ വിരിഞ്ഞപ്പോഴും അവരെല്ലാം സവര്‍ണ്ണരായിരുന്നു. അദ്ദേഹത്തിന്‍റെ ചിത്രങ്ങളുടെ കോപ്പികൾ സാധാരണക്കാരിലേക്കും സുലഭമായി എത്തിയതോടെ അത് വ്യാപകമായി.

പുരാണകഥയിലെ കഥാപാത്രങ്ങളെയെല്ലാം രാജാരവിവര്‍മ്മ ചിത്രീകരിച്ചിരുന്നത് വെണ്‍നിറമുള്ളവരായായിരുന്നു. കൃഷ്ണനും രാമനും പരമശിവനും മാത്രമാണ് അന്ന് കാര്‍വര്‍ണത്തിൽ അവതരിപ്പിക്കപ്പെട്ടത്. എന്നാൽ ഈ കാഴ്ചപ്പാടുകളെ തിരുത്തിയെഴുതാൻ ശ്രമിക്കുകയാണ് ചെന്നൈയിൽ നിന്നുള്ള രണ്ട് ഫോട്ടോഗ്രാഫര്‍മാർ. കറുപ്പ് ദൈവികമാണ്(ഡാര്‍ക്ക് ഈസ് ഡിവൈൻ) എന്ന പേരിലാണ് രണ്ട് യുവ ഫോട്ടോഗ്രാഫര്‍മാർ പൊതുവായ ആശയത്തില്‍ ചില തിരുത്തലുകളുമായി എത്തുന്നത്.



ചെന്നൈയിലെ അഞ്ച് വയസ് മാത്രം പ്രായമുള്ള ഫിലിം പ്രൊഡക്ഷൻ ഹൗസായ സ്ലിങ്ഷോട്ട് ക്രിയേഷൻസിന്‍റെ നടത്തിപ്പുകാരായ ഭരത്‍‍രാജ് സുന്ദറും നരേഷ് നില്ലും ചേര്‍ന്നാണ് പുത്തൻ ആശയവുമായെത്തിയിരിക്കുന്നത്. നാം ആരാധിക്കുന്ന ദൈവങ്ങളെല്ലാം സവര്‍ണരാണെന്ന ഇവരുടെ കണ്ടെത്തലിൽ നിന്നാണ് പുത്തൻ ആശയം ഉടലെടുത്തത്. കണ്ട് ശീലിച്ച സവര്‍ണ ദൈവങ്ങളെ കാര്‍വര്‍ണത്തിൽ അവതരിപ്പിച്ചാണ് ഈ യുവാക്കൾ രംഗത്തെത്തിയിരിക്കുന്നത്.



രണ്ട് മാസത്തിനുള്ളിലാണ് അവരുടെ പുത്തൻ ആശയത്തിന് ചിറകുമുളച്ചത്. ഹിന്ദു ഐതീഹ്യപ്രകാരമുള്ള ലക്ഷ്മി, ദുര്‍ഗ്ഗ, സരസ്വതി, പരമശിവൻ, ബാലമുരുകൻ, ലവ-കുശനോടൊപ്പമുള്ള സീത, ഉണ്ണിക്കണ്ണൻ എന്നീ ഏഴ് ദൈവങ്ങളെയാണ് ഇവര്‍ പുത്തൻ ആശയത്തിനായി തെരഞ്ഞെടുത്തിരിക്കുന്നത്. ആദ്യം 12 ദൈവങ്ങളെയായിരുന്നു തെരഞ്ഞെടുത്തതെങ്കിൽ സമയക്കുറവും ബഡ്ജറ്റ്കുറവും മൂലം അത് ആറ് പേരായി ചുരുങ്ങുകയായിരുന്നു. ഷൂട്ടിങ്ങിന് ശേഷമായിരുന്നു ലവകുശനോടൊപ്പമുള്ള സീത എന്ന ആശയം കൂടി യാഥാര്‍ഥ്യമായതെന്ന് ഭരത്‍‍രാജ് സുന്ദര്‍ വ്യക്തമാക്കുന്നു.



ഈ യുവാക്കൾ വികാരങ്ങളെ വ്രണപ്പെടുത്താൻ ഒരിക്കലും ഉദ്ദേശിച്ചിട്ടില്ല. ദിവ്യത്വത്തിന്‍റെ വേറിട്ടൊരു കാഴ്ചയാണ് ഇവര്‍ സമ്മാനിക്കുന്നത്.