യുവതിയോട് ലൈംഗികാഭ്യർത്ഥന നടത്തിയ ഡെലിവറി ബോയ് അറസ്‌റ്റിൽ

ബാംഗ്ലൂർ: യുവതിയോട് ലൈംഗികച്ചുവയോടെ സംസാരിക്കുകയും ഫോൺ നമ്പർ വാട്ട്‌സ്ആപ്പിൽ പ്രചരിപ്പിച്ച് ശല്യപ്പെടുത്തുകയും ചെയ്‌ത ഫുഡ് ഡെലിവറി ബോയിയെ പോലീസ് അറസ്‌റ്റ് ചെയ്‌തു. ബാംഗ്ലൂർ ജെപി നഗറിലാണ് സംഭവം. ശ്രേയസ് എന്ന 20-കാരനാണ് അറസ്‌റ്റിലായത്. വിവിധ നമ്പറുകളിൽ നിന്ന് ദിനംപ്രതി നൂറുകണക്കിന് കോളുകളാണ് യുവതിക്ക് ലഭിച്ച് കൊണ്ടിരുന്നതെന്ന് പോലീസ് പറഞ്ഞു.

യുവതി പോലീസിന് നൽകിയ പരാതിയിൽ പറയുന്നതിങ്ങനെ: ജൂലൈ 8-ന് ഫുഡ്‌പാണ്ട എന്ന വെബ്‌സൈറ്റ് മുഖേന മക്‌ഡൊണാൾസിൽ നിന്ന് ഭക്ഷണം ഓർഡർ ചെയ്‌തു. രാത്രി 10 മണിയോടെ ഭക്ഷണവുമായെത്തിയ ഡെലിവറി ബോയ് ഇവരെ തുറിച്ച് നോക്കുകയും ലൈംഗികച്ചുവയോടെ സംസാരിക്കുകയും ചെയ്‌ത് ‌മടങ്ങിപ്പോയി.

അര മണിക്കൂറിന് ശേഷം വീണ്ടും ഫോണിലേക്ക് വിളിച്ച് മോശമായി സംസാരിച്ച ഇയാളോട് യുവതി ദേഷ്യപ്പെട്ട് ഫോൺ വെച്ചു. തുടർന്നാണ് വിവിധ നമ്പറുകളിൽ നിന്ന് കോളുകൾ വരാൻ തുടങ്ങിയത്. പലരും തനിക്ക് വിലയിടുന്ന രീതിയിലാണ് സംസാരിച്ചത് എന്നും യുവതിയുടെ പരാതിയിൽ പറയുന്നു.

എന്നാൽ ഡെലിവറി ചെയ്യാൻ ചെന്ന തന്നെ ഭക്ഷണം നല്ലതെന്ന് പറഞ്ഞ് ആക്ഷേപിക്കുകയും പണം നൽകാതിരിക്കുകയും ചെയ്‌തതിന്റെ പ്രതികാരമായാണ് നമ്പർ വാട്ട്‌സ്ആപ്പ് ഗ്രൂപ്പിൽ പ്രചരിപ്പിച്ചതെന്ന് അറസ്‌റ്റിലായ ശ്രേയസ് മൊഴി നൽകിയിരിക്കുന്നത്.