ശീതൾ ശ്യാമിനെ അപമാനിച്ച് ഇറക്കിവിട്ടു; ലോഡ്ജ് ഉടമ അറസ്റ്റിൽ

കോഴിക്കോട്: ട്രാന്‍സ് ജെന്‍ഡര്‍ ആക്ടിവിസ്റ്റ് ശീതള്‍ ശ്യാമിനെ അപമാനിച്ച സ്വകാര്യ ലോഡ്ജ് ഉടമ അറസ്റ്റില്‍. ശീതള്‍ ശ്യാമിന് റൂം നല്‍കാതെ സ്വകാര്യ ലോഡ്ജ് ഉടമയും ജീവനക്കാരും അപമാനിച്ചെന്നാണ് പരാതി. തിങ്കളാഴ്ച രാവിലെ വടകരയിൽ മൊകേരി ഗവണ്‍മെന്‍റ് കോളേജ് യൂണിയന്‍ ഉദ്ഘാടനം ചെയ്യാനെത്തിയപ്പോളാണ് സംഭവം.


യൂണിയന്‍ ഉദ്ഘാടനം ചെയ്യാനെത്തിയ ശീതളിനായി കോളേജ് ഭാരവാഹികള്‍ അല്‍ സഫ ലോഡ്ജില്‍ റൂം ബുക്ക് ചെയ്തിരുന്നു. എന്നാല്‍ ലോഡ്ജിലെത്തിയ ശീതളിന് റൂം നല്‍കാന്‍ ജീവനക്കാര്‍ തയ്യാറായില്ല. ഇത്തരക്കാര്‍ക്ക് റൂം നല്‍കരുതെന്ന് പൊലീസ് നിര്‍ദ്ദേശമുണ്ടെന്നായിരുന്നു ജീവനക്കാ‍ർ പറഞ്ഞത്. ശീതളിന് നേരിട്ട അധിക്ഷേപത്തില്‍ അടിയന്തര നടപടി എടുക്കുമെന്ന് മന്ത്രി കെ.കെ. ശൈലജ വ്യക്തമാക്കി. ഹോട്ടലിനെതിരെ നിയമനടപടി എടുക്കും. ശക്തമായ നടപടിയുണ്ടാകുമെന്ന് മന്ത്രി വ്യക്തമാക്കി.ശീതളിന്‍റെ പരാതിയില്‍ അല്‍ സഫ ലോഡ്ജ് ഉടമയെ പൊലീസ് അറസ്റ്റ് ചെയ്തു.