കൊച്ചിക്കാർക്കായി ഇനി 'ദേ ഓട്ടോ' ആപ്പും

കൊച്ചിയിലെ കുറച്ച് എഞ്ചിനീയേഴ്സ് ചേർന്ന് ഓട്ടോറിക്ഷാ തൊഴിലാളികൾക്കായി ഒരു ആപ്പ് അണിയിച്ചൊരുക്കിയിരിക്കുകയാണ്, 'ദേ ഓട്ടോ' എന്ന പേരിൽ. കൊച്ചിക്കാരുടെ യാത്രാസൗകര്യം കണക്കിലെടുത്ത് നൂറോളം ഓട്ടോകളെ ആദ്യഘട്ടത്തിൽ പെടുത്തിയാണ് ആപ്പിന്റെ പ്രവർത്തനം. 'ജസ്റ്റ് വൺ ക്ലിക്ക് ആൻഡ് വി ആർ ദെയർ ഇൻ എ ഫ്ലിക്ക്' എന്നാണ് ദേ ഓട്ടോ ആപ്പിന്റെ ടാഗ് ലൈൻ.
യൂബർ, ഒല തുടങ്ങിയ കോളിംഗ് ക്യാബുകളുടെ വരവോടെ ഓട്ടോ ഓട്ടം നഷ്ടത്തിലായ സാധാരണക്കാരായ ഓട്ടോഡ്രൈവർമാരുടെ രക്ഷയ്ക്കായാണ് ഈ ആപ്പ്. ചെറിയ ദൂരങ്ങൾക്കുപോലും തങ്ങളുടെ സ്മാർട്ട് ഫോണിൽ കോളിംഗ് ക്യാബുകൾ വിളിക്കുന്ന തലമുറയാണിപ്പോഴുള്ളത്. അതിനൊരു പരിഹാരമായാണ് ദേ ഓട്ടോ ആപ്പ്. ഈ ആപ്പ് ഡൌൺലോഡ് ചെയ്ത് സ്മാർട്ട് ഫോണിൽ ഓട്ടോ ആപ്പുവഴി ബുക്ക് ചെയ്യാനാകും.


ടി.ആ‍ർ നിഥിൻ, ജയപ്രകാശ് എന്നിവരാണ് ഈ ആപ്പിനുപിന്നിലുള്ളത്. സ്ത്രീകൾക്ക് പ്രശ്നങ്ങളുണ്ടായാൽ പോലീസിനെ ബന്ധപ്പെടുന്നതിനുള്ള അത്യാവശ്യത്തിനായി എസ്ഒഎസ് ഓപ്ഷനുമുണ്ട്. പോലീസ് കണട്രോൾ റൂമിലേക്ക് നേരിട്ട് സന്ദേശം അയക്കാനാകും. വിനോദസഞ്ചാരികൾക്കും മറ്റും ഏറെ ഉപകാരപെടുന്നതിനായിട്ടാണിത്. പ്രീപെയ്ഡ് ഓട്ടോ നിരക്ക് തന്നെയായിരിക്കും കി.മീറ്ററിന് ഈടാക്കുക. ഇതോടെ അധികചാർജ് ഈടാക്കുന്ന ഓട്ടോകൾക്ക് പരിഹാരമാകും.

ഞായറാഴ്ചയാണ് ആപ്പിന്റെ പ്രകാശനം. യാത്രക്കാർക്ക് ലോഞ്ചിംഗ് ഓഫറുമുണ്ടാകും. കൊച്ചി കഴിഞ്ഞാൽ ആലുവ, കാക്കനാട് തുടങ്ങിയ ഇടങ്ങളിലേക്കും വൈകാതെ സേവനം വിപുലമാക്കും. ഓട്ടോക്കാരുടെ യൂണിയനുകളുടെ പിന്തുണയോടെയാണ് ആപ്പ് പുറത്തിറക്കിയിരിക്കുന്നത്.