മുഖത്ത് നാലര കിലോ ഭാരമുള്ള മുഴയുമായി ഇമ്മാനുവൽ; നിസഹായരായി മാതാപിതാക്കൾ

കാണുന്നവർക്ക് ഭീകരജീവിയെപ്പോലെ തോന്നുമെങ്കിലും മകന്‍റെ ദിവസേനയുള്ള രൂപമാറ്റത്തിൽ നിസഹായരായി നോക്കി നിൽക്കുകയാണ് മാതാപിതാക്കൾ. ക്യൂബയിൽ ജീവിക്കുന്ന 14 കാരനായ ഇമ്മാനുവലിന്‍റെ മുഖത്ത് വളർന്നുകൊണ്ടിരിക്കുന്ന ബാസ്ക്കറ്റ് ബോൾ രൂപത്തിലുള്ള മുഴയാണ് ഇവരെ സങ്കടത്തിലാക്കുന്നത്. മകനെ ഈ അവസ്ഥയിൽ നിന്നും രക്ഷപ്പെടുത്താൻ സമീപിക്കാത്ത ഡോക്ടർമാരോ ആശുപത്രികളോ ഇല്ല. ഒടുവിൽ ഈ മാതാപിതാക്കളുടെ പ്രാർത്ഥന കേട്ട് മിയാമിയിലെ പ്രശസ്തനായ ഒരു ഡോക്ടർ എത്തിയിരിക്കുകയാണ്. അപകട സാധ്യതയേറെയുള്ള ഒരു ശസ്ത്രക്രിയയിലൂടെ മാത്രമെ മുഴ നീക്കം ചെയ്യാൻ കഴിയൂ എന്നാണ് ഡോക്ടർ പറയുന്നത്.



പോളിയോസ്റ്റോട്ടിക് ഫൈബ്രസ് ഡിസ്പ്ലാസിയ എന്ന ഗുരുതര രോഗമാണ് ഇമ്മാനുവലിനെ ബാധിച്ചിരിക്കുന്നത്. അസ്ഥിയുടെ ചില ഭാഗങ്ങള്‍ തന്തു കോശങ്ങൾ കൊണ്ട് മൂടുന്ന ഒരു അവസ്ഥയാണ് ഇതെന്നാണ് ഡോക്ടർ പറയുന്നത്. കുഞ്ഞിലെ രോഗലക്ഷണങ്ങ8 കണ്ടിരുന്നുവെങ്കിലും പതിനൊന്നാമത്തെ വയസിലാണ് മാരകരോഗമാണെന്ന് തിരിച്ചറിയുന്നത്. മൂക്കിനു മുകളില്‍ ചെറിയ കുരു രൂപത്തിലായിരുന്നു തുടക്കം. പിന്നീട് കുരു ക്രമാതീതമായി വളരാൻ തുടങ്ങി. ക്രമേണ നാലര കിലോയോളം ഭാരമുള്ള വലിയ മുഴയായി മാറി. ഇമ്മാനുവലിന്‍റെ മുഖം മൂടുന്ന രൂപത്തിൽ തന്നെ മുഴ വളർന്നു.

വായിൽ കൂടിയാണ് ഇമ്മാനുവൽ ശ്വസിക്കുന്നത്. കാഴ്ചയും ഈ മുഴ തടസമാണ്. മുഴ ഉടൻ നീക്കം ചെയ്തില്ലെങ്കിൽ ശ്വസിക്കാൻ കൂടുതൽ പ്രയാസം നേരിടുകയും ചെയ്യും. 1.28 കോടി രൂപയാണ് ശസ്ത്രക്രിയക്കായി ആവശ്യമായി വരുന്നത്. വിശദമായ ഒരുപാട് അന്വേഷണങ്ങൾക്ക് ഒടുവിലാണ് മിയാമിയിൽ നിന്നും ശസ്ത്രക്രിയ നടത്താൻ ഈ ഡോക്ടർ എത്തിച്ചേർന്നത്. മുഴ നീക്കം ചെയ്താൽ മാത്രം പോര മൂക്കിനെ പൂർവ്വസ്ഥിതിയിലാക്കുക എന്ന ദൗത്യം കൂടിയുണ്ട് ഈ ഡോക്ടറിന് മുന്നിൽ. എങ്കിൽ മാത്രമെ ഇമ്മാനുവലിന് തടസം കൂടാതെ ശ്വസിക്കാൻ കഴിയുകയുള്ളൂ. ഇമ്മാനുവലിന് പഴയ രൂപം തിരികെ കിട്ടാന്‍ താടിയിലും കവിളിലുമെല്ലാം പ്ലാസ്റ്റിക് സര്‍ജറിയും നടത്തേണ്ടി വരും.