ഇവർ കാൻസറിനെ തോല്‍പിക്കുകയാണ്; സ്നേഹം കൊണ്ട്

മലപ്പുറം: താൻ സ്നേഹിച്ചിരുന്ന പെൺകുട്ടിക്ക് അര്‍ബുദമാണെന്നറിഞ്ഞപ്പോഴും ആ യുവാവ് അവളെ ചേര്‍ത്തുപിടിച്ചു. വിവാഹം കഴിക്കുമെന്ന വാക്കുകൊടുത്തു. ഒടുവില്‍ അവർ ഒന്നായി. മലപ്പുറം സ്വദേശികളായ സച്ചിൻ കുമാറിന്‍റേയും ഭവ്യയുടേയും ജീവിതകഥ സുഹൃത്തുകള്‍ ഫേസ്ബുക്കിൽ പങ്കുവെച്ചതോടെ ഏറെ ശ്രദ്ധനേടിയിരിക്കുകയാണ്.

അർബുദത്തെ പ്രണയം കൊണ്ട് തോൽപിക്കാനൊരുങ്ങുകയാണ് ഇവർ. 2017-ൽ ഒരേ സ്ഥാപനത്തിൽ അക്കൗണ്ടിംഗ് പഠിക്കാനെത്തി പ്രണയത്തിലായവരായിരുന്നു ഇവർ. ഇവരുടെ സൗഹൃദം പതിയെ പ്രണയത്തിലേക്ക് വഴി മാറി. രണ്ടു പേരും ഒന്നിച്ച് ജീവിക്കാൻ തീരുമാനിച്ചു. ഭവ്യയ്ക്ക് നിലമ്പൂർ ബാങ്കിൽ ജോലി ലഭിച്ചു. സച്ചിനും പഠനം പൂർത്തിയാക്കി നല്ലൊരു ജോലി സമ്പാദിക്കാനുള്ള ശ്രമം തുടങ്ങി.


അതിനിടയില്‍ ശക്തമായ പുറംവേദനയുടെ രൂപത്തിൽ രോഗം ഭവ്യയെ കീഴ്‍പ്പെടുത്തി തുടങ്ങിയിരുന്നു. പരിശോധനകൾക്കൊടുവിൽ എല്ലിനെ ബാധിച്ചിരിക്കുന്ന കാൻസറാണെന്ന് തിരിച്ചറിഞ്ഞു. സച്ചിൻ ഭവ്യയെ ചേര്‍ത്തുപിടിച്ചു. സച്ചിന്റെ സ്നേഹത്തിന്റെ തണലിൽ‌ ജീവിതം മുന്നോട്ട് നയിക്കാമെന്ന് ഭവ്യയും കരുതുകയായിരുന്നു. കൂലിപ്പണിക്കാരനായിരുന്ന അച്ഛന്റെ വരുമാനത്തിൽ ഭവ്യയുടെ ചികിത്സാ ചെലവുകൾ മുന്നോട്ട് പോകില്ലെന്ന് തിരിച്ചറിഞ്ഞപ്പോൾ സച്ചിനും പഠനം പാതിവഴിയിൽ ഉപേക്ഷിച്ച് കൂലിപ്പണിക്കിറങ്ങി. അങ്ങനെ മാർബിൾ പണിക്ക് പോയി കിട്ടുന്ന വരുമാനം കൊണ്ടാണ് രണ്ട് കുടുംബങ്ങളെയും ഭവ്യയുടെ ചികിത്സയും ഇപ്പോള്‍ മുന്നോട്ട് പോകുന്നത്.

ആദ്യത്തെ കീമോ കഴിഞ്ഞപ്പോൾ തന്നെ ഇവരുടെ വിവാഹ നിശ്ചയം കഴിഞ്ഞു. എട്ടാമത്തെ കീമോയ്ക്കായി പോയപ്പോള്‍ ഭവ്യ സച്ചിന്റെ പ്രണയിനി ആയിരുന്നില്ല, ഭാര്യയായിരുന്നു. ലളിതമായി ചടങ്ങുകളോട് കൂടിയായിരുന്നു വിവാഹം. സച്ചിന്‍റെ സുഹൃത്തായ മലപ്പുറം സ്വദേശിയായ അരവിന്ദാണ് സച്ചിന്റെയും ഭവ്യയുടെയും ജീവിതം ഫേസ്ബുക്കിലൂടെ പുറംലോകത്തെ അറിയിച്ചിരിക്കുന്നത്.