നിലമുഴുത കര്‍ഷകന് കിട്ടിയത് സ്വര്‍ണനാണയങ്ങള്‍

ചാന്ത്‍പൂര്‍ എന്ന കര്‍ഷക ഗ്രാമത്തില്‍ ഒരിക്കല്‍ തന്‍റെ കൃഷിയിടം ഉഴുത കര്‍ഷകന് മണ്ണില്‍ നിന്നൊരു സ്വര്‍ണ്ണനാണയം കിട്ടി. അത്ഭുതത്തോടെ അയാള്‍ വീണ്ടും അതേ സ്ഥലത്ത് ഉഴുതു. പിന്നെയും കിട്ടി കുറച്ച് സ്വര്‍ണനാണയങ്ങള്‍. ഉഴല്‍ നിര്‍ത്തി അവിടം കുഴിച്ച് നോക്കിയപ്പോള്‍ ഒരു പിടി സ്വര്‍ണനാണയങ്ങള്‍ കിട്ടി. പിന്നെയും കുഴിച്ചപ്പോള്‍ കുറേ ചെമ്പു പാത്രങ്ങളും.

നാടോടിക്കഥയല്ല- ഉത്തര്‍ പ്രദേശിലെ ബിജ്‍നോറിലുള്ള ഹരിനഗര്‍ പ്രദേശത്താണ് മണ്ണിനടിയില്‍ നിന്ന് നിധിശേഖരവും നിത്യോപയോഗ വസ്തുക്കളും കണ്ടെടുത്തത്. സിന്ധു നദീതട സംസ്കാരത്തിന്‍റെ ബാക്കിപത്രങ്ങളാണ് 4,500 വര്‍ഷം പഴക്കം വരുന്ന ഈ നാണയങ്ങളും പാത്രങ്ങളും. കര്‍ഷകന് നിധി കിട്ടിയ വാര്‍ത്ത പടര്‍ന്നതോടെ ചുറ്റുമുള്ള കൃഷിയിടങ്ങളെല്ലാം നാട്ടുകാര്‍ കുഴിച്ചിളക്കി. എന്നാല്‍ അവര്‍ക്ക് കിട്ടിയത് ഏതാനും പാത്രങ്ങളും തകിടുകളും മറ്റുമാണ്.

ജില്ലാ ജഡ്‍ജി ബി ചന്ദ്രക്കല വാര്‍ത്തയറിഞ്ഞ ഉടനെ ഇന്ത്യന്‍ പുരാവസ്തു ഗവേഷണ വകുപ്പിനെ (എഎസ്ഐ) വിവരമറിയിച്ചു. ആഗ്രയിലുള്ള ഓഫീസില്‍ നിന്നും എഎസ്ഐ സംഘം സ്ഥലത്തെത്തിയപ്പോഴേക്കും നിധിവേട്ടക്കാരെ നിയന്ത്രിക്കാന്‍ പോലീസ് എത്തിക്കഴിഞ്ഞിരുന്നു. കണ്ടെടുത്ത വസ്തുക്കള്‍ ഹാരപ്പന്‍ കാലഘട്ടത്തിലെ ആയിരിക്കുമെന്ന് സൂപ്രണ്ടിംഗ് ആര്‍ക്കിയോളജിസ്റ്റ് (ആഗ്ര സര്‍ക്കിള്‍) ഭുവന്‍ വിക്രം പറഞ്ഞു. ഇവയുടെ യഥാര്‍ത്ഥ പഴക്കം നിര്‍ണയിക്കാന്‍ ഗവേഷണ ഓപ്പറേഷന് പദ്ധതിയിടും എന്നും ഇദ്ദേഹം പറഞ്ഞു.