'ഹേയ് ജൂഡി'ൽ ഞാനെന്‍റെ മകനെ കണ്ടു;പിതാവിന്‍റെ കുറിപ്പ്

ശ്യാമ പ്രസാദ് സംവിധാനം ചെയ്ത ''ഹേയ് ജൂഡ്'' തിയറ്ററിൽ മികച്ച പ്രതികരണം നേടുകയാണ്. ഒാട്ടിസം ബാധിച്ച യുവാവിന്റെ കഥ കഥപറയുന്ന സിനിമയാണ് ഹേ ജൂ‍ഡ്. സിനിമകണ്ട ശേഷം സെയ്ദ് ഷിയാസ് മിർസ എന്ന യുവാവ് ഫേസ് ബുക്കിൽ കുറിച്ച വാക്കുകൾ ഇപ്പോള്‍ വൈറലാവുകയാണ്. ഓട്ടിസം ബാധിച്ച കുട്ടികളുള്ള മാതാപിതാക്കള്‍ക്ക് ആത്മവിശ്വാസവും പ്രതീക്ഷയും നൽകാൻ കഴിയുന്ന രീതിയിൽ ഈ സിനിമ യാഥാർത്ഥ്യമാക്കിയവരോട് ഞങ്ങളെപ്പോലുള്ള രക്ഷകർത്താക്കൾ കടപ്പെട്ടിരിക്കുന്നുവെന്നാണ് അദ്ദേഹം കുറിച്ചിരിക്കുന്നത്. നടൻ നിവിൻ പോളി ഈ കുറിപ്പ് ഷെയർ ചെയ്തതോടെ നിരവധി കമന്‍റുകളും ഷെയ്റുകളുമാണ് ലഭിക്കുന്നത്.

ഷിയാസിന്റെ കുറിപ്പ് വായിക്കാം:


ഹേയ് ജൂഡ്‌ കണ്ടു. ഓട്ടിസത്തിനു സമാനമായ അവസ്ഥയിലുള്ള ഒരു യുവാവിന്റെ ജീവിതം ഏറെ സൂക്ഷ്മമായ നിരീക്ഷണങ്ങൾക്ക്‌ ശേഷമാണ് ഇതിൽ അവതരിപ്പിച്ചിരിക്കുന്നത്‌. നിങ്ങളുടെ വീട്ടിലോ പരിസരത്തോ അല്ലെങ്കിൽ ഒരിക്കലെങ്കിലും ഇത്തരം വ്യക്തികളെ നിങ്ങൾ കണ്ടിട്ടുണ്ടെങ്കിലോ ഈ ചിത്രം നിങ്ങൾ നിർബന്ധമായും കാണണം.

അത്തരക്കാർ അവരുടെ ഒരോ ദിവസവും എന്ത്‌ കഷ്ടപ്പെട്ടാണ് മുന്നോട്ട് കൊണ്ട്‌ പോകുന്നത് എന്നത്‌ ഈ സിനിമയിൽ വ്യക്തമായി പകർത്തിയിട്ടുണ്ട്. ശ്രീ. ശ്യാമപ്രസാദിന്റെയും നിവിൻ പോളിയുടെ കരിയറിലെ മികച്ച ഒരു സിനിമ തന്നെയാണിത്.

ഒരു സിനിമ എന്നതിനപ്പുറം ഏറെ സാമൂഹിക പ്രതിബദ്ധതയോടെ നമ്മുടെ ജനങ്ങൾക്ക് ഏറെ പരിചിതമായിട്ടില്ലാത്ത ഒരു വിഷയം തന്മയത്വത്തോടെ കൈകാര്യം ചെയ്യാൻ കഴിഞ്ഞു എന്നതിൽ ഈ സിനിമയുടെ പിന്നണിയിലുള്ളവർക്ക്‌ അഭിമാനിക്കാം.

ഓട്ടിസം ബാധിതനായ ഒരു കുട്ടിയുടെ പിതാവ്‌ എന്ന രീതിയിൽ വിലയിരുത്തിയാൽ ഈ സിനിമയുടെ പ്രേക്ഷകനായി തിയേറ്ററിൽ എത്തിയ ശേഷം ഒരു നിമിഷം പോലും സങ്കടം കൊണ്ട് കണ്ണ് നിറഞ്ഞില്ല; മറിച്ച് സവിശേഷ ശേഷികളുള്ള എന്റെ മകനെയോർത്ത് എനിക്ക്‌ അഭിമാനിക്കാനായി.

എന്നെപ്പോലെ മക്കളുടെ അവസ്ഥ ഓർത്ത്‌ ആകുലപ്പെടുന്നവർക്ക്‌ ചെറിയ തോതിലാണ് എങ്കിൽ പോലും ആത്മവിശ്വാസവും പ്രതീക്ഷയും നൽകാൻ കഴിയുന്ന രീതിയിൽ ഈ സിനിമ യാഥാർത്ഥ്യമാക്കിയവരോട് ഞങ്ങളെപ്പോലുള്ള രക്ഷകർത്താക്കൾ കടപ്പെട്ടിരിക്കുന്നു.

Hey Yasin you can..You will...

#Heyjude