ഹെല്‍മെറ്റില്ലെങ്കില്‍ പമ്പില്‍ നിന്ന് പെട്രോള്‍ കിട്ടില്ല!!

കൊച്ചി: ഹെല്‍മെറ്റിന്‍റെ അനിവാര്യതയെക്കുറിച്ച് ബോധവത്കരണം നടത്തുന്നതിനായി കോടനാട് പോലീസിന്‍റെ പുതിയ ആശയമാണ് ഹെല്‍മെറ്റ് ഇല്ലാതെ വന്നാല്‍ പെട്രോള്‍ പമ്പില്‍ നിന്ന് പെട്രോള്‍‍ കൊടുക്കില്ല എന്ന്. കൂവപ്പടിയിലെ പെട്രോള്‍ പമ്പുമായി സഹകരിച്ച് പരീക്ഷണാടിസ്ഥാനത്തില്‍ ഇൗ പദ്ധതി നടപ്പിലാക്കിയിരിക്കുകയാണ്. കേരളത്തിലെ മറ്റ് ജില്ലകളിലും പരീക്ഷണാടിസ്ഥാനത്തില്‍ പമ്പുടമകളുമായി സഹകരിച്ച് ഈ പദ്ധതി നടപ്പിലാക്കുന്നുണ്ട്.

"കാര്യം സൂചിപ്പിച്ചപ്പോള്‍ത്തന്നെ പമ്പുടമ സമ്മതം മൂളുകയായിരുന്നു. കൂവപ്പടിയിലേയും കോടനാട്ടിലേയും യാത്രക്കാരും ബൈക്ക് യാത്രികരും നന്നായി സഹകരണവും പ്രോത്സാഹനവും നല്‍കുന്നുണ്ട്. ഇത് മാതൃകയാക്കി ധാരാളം പമ്പുടമകള്‍ മുന്നോട്ട് വരണമെന്നാണ് ഞങ്ങള്‍ ആഗ്രഹിക്കുന്നത്". കോടനാട് സബ് ഇന്‍സ്പെക്ടര്‍ ടി. ദിനീഷ് പറഞ്ഞു. കോടനാടുള്ള മറ്റു ചില പമ്പുകളും ഈ ക്യാമ്പയിനില്‍ ചേരാന്‍ തയ്യാറെന്ന് അറിയിച്ചിട്ടുണ്ടെന്നാണ് ഇദ്ദേഹം പറയുന്നത്.

കോടനാട് പോലീസിന്‍റെ ഈ സംരംഭത്തില്‍ നിന്ന് പ്രചോദനമുള്‍ക്കൊണ്ട് എറണാകുളത്തിന്‍റെ വിവിധ ഭാഗങ്ങളില്‍ ഇത്തരം ക്യാമ്പെയിനുകള്‍ നടത്താന്‍ ആലോചിക്കുന്നുണ്ടെന്ന് എറണാകുളം റൂറല്‍ എസ്.പി. യതീഷ് ചന്ദ്ര ജി. എച്ച്. അറിയിച്ചു.

മലപ്പുറത്ത് ഇൗ പദ്ധതി തുടങ്ങിയെങ്കിലും വിജയകരമായിരുന്നില്ല. എന്നാല്‍ കണ്ണൂരില്‍ വന്‍ വിജയമായിരുന്നു. അതേ സമയം പുതുതായി വില്‍ക്കുന്ന ഇരു ചക്ര വാഹനങ്ങള്‍ക്കൊപ്പം ഹെല്‍മെറ്റും സൗജന്യമായി നല്‍കണമെന്ന് മോട്ടോര്‍ വെഹിക്കിള്‍സ് ഡിപ്പാര്‍ട്ട്മെന്‍റ് ഉത്തരവിറക്കിയിട്ടുണ്ട്. ഏപ്രില്‍ ഒന്നു മുതല്‍ ഇത് നിലവില്‍ വരും.