kochi muziris biennale 2018 ബിനാലെ ഇന്ന് തുടങ്ങും

കൊച്ചി: ദക്ഷിണേന്ത്യൻ കലാ വിരുന്നായ കൊച്ചി മുസിരിസ് ബിനാലെയ്ക്ക് ഇന്ന് തുടക്കം. ഇന്ന് വൈകീട്ട് 6.30ന് ഫോര്‍ട്ട്‌കൊച്ചി പരേഡ് ഗ്രൗണ്ടില്‍ മുഖ്യമന്ത്രി പിണറായി വിജയൻ ബിനാലെ നാലാം ലക്കത്തിൻ്റെ ഉദ്ഘാടനം നിർവഹിക്കും. ലോകപ്രശസ്ത ആർട്ടിസ്ററ് അനിത ദുബെയാണ് ബിനാലെയുടെ ക്യൂറേറ്റ‍ർ. 108 ദിവസം നീണ്ടു നിൽക്കുന്ന ബിനാലെയിൽ 30 രാജ്യങ്ങളിൽ നിന്നായി 94 കലാകാരൻമാ‍ർ പങ്കെടുക്കും. ഡിസംബര്‍ 12 മുതല്‍ 2019 മാര്‍ച്ച്‌ 29 വരെയാണ് ബിനാലെ.

ഇന്ന് രാവിലെ ആസ്പിന്‍വാള്‍ ഹൗസില്‍ പതാകയുയര്‍ത്തല്‍ ചടങ്ങ് നടക്കും. വൈകുന്നേരം മെക്സിക്കന്‍ ആര്‍ട്ടിസ്റ്റായ താനിയ കാന്‍ഡിയാനിയുടെ കലാപ്രകടനവും നെതര്‍ലാന്‍റില്‍ താമസിക്കുന്ന ലെബനീസ് ആര്‍ട്ടിസ്റ്റ് റാന ഹമാദെയുടെ പ്രഭാഷണവും ഉണ്ടാകും. ആസ്പിന്‍വാള്‍ ഹൗസ് കൂടാതെ, എറണാകുളം ഡര്‍ബാര്‍ഹാള്‍, പെപ്പര്‍ഹൗസ്, കബ്രാള്‍ യാര്‍ഡ്, ഡേവിഡ് ഹാള്‍, കാശി ടൗണ്‍ ഹൗസ്, കാശി ആര്‍ട്ട് കഫെ, ആനന്ദ് വെയര്‍ഹൗസ്, എംഎപി പ്രൊജക്ട്സ് സ്പേസ്, ടി കെ എം വെയര്‍ഹൗസ് എന്നിവയാണ് മറ്റു വേദികള്‍.200 ഓളം വിദ്യാര്‍ത്ഥികളുടെ സൃഷ്ടികളുമായി സ്റ്റുഡൻ്റ് ബിനാലെയും സംഘടിപ്പിക്കും