ഇത് ഫ്രീലി; നഗരജീവിതം മടുത്തു കാട്ടിലേക്ക് കുടിയേറിയവള്‍

നഗരതിരിക്കിലലിഞ്ഞ് നടക്കുമ്പോള്‍ ചിലർക്കെങ്കിലും മടുപ്പുതോന്നാതിരിക്കില്ല. ചെവിതുളയ്ക്കുന്ന ഹോണടികള്‍, എങ്ങും പൊടിയും പുകയും, തിരക്ക് പിടിച്ച് മുഖത്തുപോലും നോക്കാതെ പോകുന്നവർ അങ്ങനെ അങ്ങനെ നഗരം ചിലർക്കെങ്കിലും ഒരു ഇഷ്ടക്കേടാണ്. ഇത്തരത്തിൽ ഒരാളായിരുന്നു ഓസ്‌ട്രേലിയയിലെ യുട്യൂബറും വീഗന്‍ ബ്ലോഗറുമായ ഫ്രീലിയെന്ന യുവതി.


നഗരം വെറുത്ത് ആറുമാസം മുമ്പ് ഇവർ കാട്ടിലേക്കിറങ്ങി, യാതൊരു മുന്നൊരുക്കവുമില്ലാതെ. തനിക്ക് കൂട്ടായി തന്റെ ജീവിതപങ്കാളിയെ മാത്രമാണ് കൂടെ കൂട്ടിയത്.വസ്ത്രം പോലും ഉപേക്ഷിച്ചായിരുന്നു യാത്ര. മുപ്പത്തേഴു വയസ്സുകാരിയായ യുവതി കാട്ടില്‍ കിട്ടുന്ന കായ്കനികള്‍ ഭക്ഷിച്ച്, കാട്ടരുവിയിലെ വെള്ളം കുടിച്ച് കാടിനുള്ളില്‍ താല്‍ക്കാലികമായൊരു വീടു കെട്ടിയാണ് ഇപ്പോള്‍ പങ്കാളിയോടൊപ്പം വസിക്കുന്നത്.


കാട്ടിലെ വാസത്തെ കുറിച്ച് ഫ്രീലി ഇൻസ്റ്റഗ്രാമിൽ കുറിച്ചതിങ്ങനെയാണ്. ആറുമാസമായി ഞാന്‍ എന്റെ മുടി കളര്‍ ചെയ്യുന്നില്ല, യാതൊരുവിധ മേക്കപ്പ് സാധനങ്ങളും ഉപയോഗിക്കുന്നില്ല. ശരീരത്തിലെ രോമങ്ങള്‍ നീക്കം ചെയ്യാറില്ല, മഴയില്‍ക്കുളിച്ച് കായ്കനികള്‍ ഭക്ഷിച്ച് സ്വതന്ത്രയായി ജീവിക്കുന്നു’. ഈ ഭാഗ്യം തനിക്കു മാത്രമുള്ളതല്ലെന്നും ഇത്തരത്തില്‍ സ്വതന്ത്രരായി ജീവിക്കാന്‍ ആഗ്രഹിക്കുന്നവര്‍ക്കു തന്റെ ജീവിതം ഒരു പ്രചോദനമാവട്ടെയെന്നും ഫ്രീലി പറ‌ഞ്ഞുവയ്ക്കുന്നു. കാട്ടിൽ നിന്നുള്ള ചിത്രങ്ങളടക്കം ദിവസവും ഫ്രീലി തന്‍റെ ഫോളോവേഴ്സിനായി പങ്കുവയ്ക്കാറുമുണ്ട്.