ചിറക്കൽ കാളിദാസന്‍റെ തകര്‍പ്പൻ സംഗീത വീഡിയോ 'ഗജം' വൈറലാകുന്നു

'ബാഹുബലി'യ്ക്ക് ശേഷം ആനകളിൽ മിന്നും താരമായ ചിറയ്ക്കൽ കാളിദാസൻ അരങ്ങുവാണ തകര്‍പ്പൻ സംഗീത വീഡിയോ 'ഗജം' വൈറലാകുന്നു. സിനിമയെ വെല്ലുന്ന രസക്കൂട്ടുകളുമായാണ് ഗജം എത്തിയിരിക്കുന്നത്. സിനിമകളെ കവച്ചുവെക്കുന്ന ദൃശ്യാവിഷ്കാരം തന്നെ എടുത്തു പറയേണ്ട ഒന്നാണ്. വിജയ് യേശുദാസും വിധു പ്രതാപും ചേര്‍ന്നാണ് പ്രശാന്ത് മോഹനന്‍റെ അതിഗംഭീര സംഗീതത്തിന് സ്വരമാധുരി പകര്‍ന്നിരിക്കുന്നത്. ഡെന്നിസ് ജോസഫാണ് ഗാനത്തിന് വരികൾ എഴുതിയിരിക്കുന്നത്.



ചിറയ്ക്കൽ കാളിദാസൻ എന്ന ആനയെക്കുറിച്ചുള്ള വീഡിയോ തുടങ്ങുന്നത് തന്നെ ‘ഇന്ദ്രപാല പാദശീർഷവും’ എന്ന വരികളോടെയാണ്. കാളിദാസനാണ് ഗാനത്തിലെ സൂപ്പര്‍ഹീറോ. ശിവപ്രസാദ് കാശിമാങ്കുളമാണ് വീഡിയോ സംവിധാനം ചെയ്തിരിക്കുന്നത്. ശ്രീകാന്ത് ഈശ്വറാണ് ഛായാഗ്രഹണം നിർവഹിച്ചിരിക്കുന്നത്. സുബിത് ബാബു, ബദ്രി കൃഷ്ണ, വിമൽ പിള്ള തുടങ്ങിയവരാണ് വിഡിയോയിൽ അഭിനയിച്ചിരിക്കുന്ന മറ്റു താരങ്ങൾ.