മനുഷ്യരുടെ ചിരി തിരിച്ചറിയാന്‍ ആടിന് കഴിവുണ്ട്

പാരീസ്: ആടിന് മനുഷ്യരുടെ ചിരിക്കുന്ന മുഖം തിരിച്ചറിയാന്‍ കഴിവുണ്ടെന്ന് വിവിധ രാജ്യങ്ങളിലായി നടന്ന പഠനം. ഫോട്ടോകളില്‍ നിന്ന് ചിരിക്കുന്ന മനുഷ്യരുടെ മുഖം തിരിച്ചറിയാനും അതനുസരിച്ച് പ്രതികരിക്കാനും ആടുകള്‍ക്ക് സാധിക്കും.

ഒരാളുടെ ചിരിക്കുന്ന മുഖവും ദേഷ്യപ്പെടുന്ന മുഖവും കണ്ടാല്‍ ചിരിക്കുന്ന മുഖമുള്ള ചിത്രമാണ് ആടുകള്‍ തെരഞ്ഞെടുക്കകയെന്ന് പഠനത്തില്‍ വ്യക്തമായി. യൂറോപ്പിലെയും ബ്രസീലിലെയും ഗവേഷകരാണ് ആടിനെക്കുറിച്ച് കൂടുതല്‍ മനസിലാക്കാന്‍ അവസരം നല്‍കുന്ന കണ്ടുപിടിത്തം നടത്തിയത്.

സന്തോഷത്തോടെ കാണുന്നവരുടെ ചിത്രങ്ങള്‍ ഏകദേശം 1.4 സെക്കന്‍ഡ്‍ ആടുകള്‍ ശ്രദ്ധിച്ചു. ദേഷ്യമുള്ള മുഖങ്ങള്‍ 0.9 സെക്കന്‍ഡിനുള്ളില്‍ അവ ഒഴിവാക്കും, പഠനത്തില്‍ പങ്കെടുത്ത ലണ്ടന്‍ ക്വീന്‍ മേരി സര്‍വകലാശാല ഗവേഷക ക്രിസ്റ്റ്യന്‍ നവ്‍രോത്ത് വാര്‍ത്ത ഏജന്‍സി എഎഫ്‍പിയോട് പറഞ്ഞു.

റോയല്‍ സൊസൈറ്റി ഓപ്പണ്‍ സയന്‍സ് എന്ന ജേണലിലാണ് പഠനം പ്രസിദ്ധപ്പെടുത്തിയത്. ആടുകള്‍ക്ക് മനുഷ്യന്‍റെ മുഖത്തെ വികാരങ്ങള്‍ വായിച്ചെടുക്കാന്‍ കഴിയുമെന്ന് സ്ഥാപിക്കുന്ന ലോകത്തിലെ ആദ്യത്തെ പഠനമാണിത്.

വളര്‍ത്തുമൃഗങ്ങളെയും മറ്റു ജീവവര്‍ഗങ്ങളെയും മനുഷ്യനുമായി ബന്ധിപ്പിക്കുന്നതില്‍ പഠനം നിര്‍ണായകമാകുമെന്ന് ഗവേഷകര്‍ പറയുന്നു.

മറ്റൊരു രസകരമായ കാര്യംകൂടി പഠനത്തില്‍ തെളിഞ്ഞിട്ടുണ്ട് - ദേഷ്യപ്പെട്ട മുഖങ്ങളുടെ വലതുവശത്ത് സന്തോഷമുള്ള മുഖങ്ങള്‍ കണ്ടാല്‍ വളരെ വേഗം ആടുകള്‍ അങ്ങോട്ട് വിധേയത്വം പ്രകടിപ്പിക്കും. ഇത്തരം ശുഭസൂചകമായ വിവരങ്ങള്‍ അപഗ്രഥിക്കാന്‍ തലച്ചോറിന്‍റെ ഇടത് വശമാണ് ആടുകള്‍ ഉപയോഗിക്കുന്നതെന്നാണ് നിഗമനം.