'സൗമ്യമായ' സെര്‍ച്ചിന് ഗൂഗിളിന്‍റെ നന്ദിവാക്ക്

'സൗമ്യ'മായ സെര്‍ച്ചിന് ബെന്നിന്‍റെ അമ്മൂമ്മയോട് ഗൂഗിള്‍ നന്ദി പറഞ്ഞു. "കോടിക്കണക്കിനു സെര്‍ച്ചുകള്‍ക്കിടയിലും നിങ്ങളുടെ സെര്‍ച്ച് ഞങ്ങളെ പുഞ്ചിരിപ്പിച്ചു" - ഗൂഗിള്‍ യു.കെ, 86കാരിയായ മെയ് ആഷ് വര്‍ത്തിനോട് ട്വീറ്റിലൂടെ പറഞ്ഞു. ഗൂഗിളിന്‍റെ ഔദ്യോഗിക ട്വിറ്റര്‍ അക്കൗണ്ടും ആഷ് വര്‍ത്തിന് സന്ദേശവുമായെത്തി.


ലോകത്തെ പുഞ്ചിരിപ്പിച്ച ആ സെര്‍ച്ച് എന്താണെന്നല്ലെ? ദയവായി ഈ റോമന്‍ നമ്പറുകള്‍ ഒന്നു തര്‍ജമ ചെയ്തു തരൂ. നന്ദി. ("Please translate these roman numerals mcmxcviii thank you.") - ഇതായിരുന്നു അത്.


ആഷ് വര്‍ത്തിന്‍റെ 25 വയസ്സുള്ള പൗത്രന്‍ ബെന്‍ എക്കര്‍സ്ലീ തന്‍റെ മുത്തശ്ശിയെ കാണാന്‍ എത്തിയപ്പോഴാണ് അവരുടെ ലാപ്ടോപ്പില്‍ ടൈപ്പ് ചെയ്ത് വച്ചിരുന്ന സെര്‍ച്ച് കാണുന്നത്.


ഉടന്‍ തന്നെ, ബെന്‍ കമ്പ്യൂട്ടര്‍ സ്ക്രീനിന്‍റെ ഫോട്ടോ ട്വീറ്റ് ചെയതു. "മുത്തശ്ശിയുടെ ലാപ്ടോപ്പ് തുറന്നു നോക്കി. അവര്‍ ഗൂഗിളില്‍ സെര്‍ച്ച് ചെയ്യുമ്പോള്‍ പ്ലീസും താങ്ക്യൂവും ചേര്‍ക്കുന്നു. ചിരിയടക്കാന്‍ വയ്യ.." - ഇതായിരുന്നു ഫോട്ടോയുടെ അടിക്കുറിപ്പ്.


"പ്രിയപ്പെട്ട മുത്തശ്ശീ, നന്ദിവാക്കിന്‍റെ ആവശ്യമില്ല" - ഗൂഗിള്‍ തിരിച്ച് ട്വീറ്റ് ചെയ്തു.


ടി.വി കാണാന്‍ ഏറെ ഇഷ്ടപ്പെടുന്ന യു.കെ ക്കാരിയായ മെയ് മുത്തശ്ശിക്ക്, കാണുന്ന ഓരോ പരിപാടിയും എന്നു നിര്‍മിച്ചതാണ് എന്നറിയാന്‍ വലിയ കൗതുകമാണ്. യു.കെ.യില്‍ പല പരിപാടികളിലും നിര്‍മ്മിച്ച വര്‍ഷം ഇപ്പോഴും റോമന്‍ നമ്പറുകളിലാണ് എഴുതിക്കാണിക്കുക. 1998 എന്ന് റോമനില്‍ എഴുതിയതിന്‍റെ അര്‍ത്ഥമാണ് മെയ് മുത്തശ്ശി ഗൂഗിളില്‍ തെരഞ്ഞത്.


പണ്ട് സ്കൂളില്‍ പഠിച്ചത് എത്ര ശരിയാണ് - വിനയത്തിന്‍റെ പദങ്ങളായ താങ്ക് യുവിനും പ്ളീസിനും മാന്ത്രിക കഴിവുകളുണ്ട്