എച്ച്എല്‍എല്‍ ഗർഭനിരോധന ഉറകൾ ഇനി ആഫ്രിക്കയിലേക്കും

തിരുവനന്തപുരം: ആഫ്രിക്കയിലേക്ക് കേരളത്തിൽനിന്ന് 1.3 ദശലക്ഷം ഗർഭനിരോധന ഉറകൾ കയറ്റുമതി ചെയ്യാനുള്ള കരാര്‍ തിരുവനന്തപുരത്ത് പ്രവര്‍ത്തിക്കുന്ന എച്ച്എല്‍എല്‍ ലൈഫ് കെയറിന് ലഭിച്ചു. സ്ത്രീകൾ ഉപയോഗിക്കുന്ന ഗര്‍ഭനിരോധന ഉറകളാണ് ആഫ്രിക്കൻ രാജ്യങ്ങളായ ബുർക്കിന ഫാസോ, ഗാമ്പിയ,കരീബിയൻ രാജ്യമായ ഡൊമിനിക്കൻ റിപബ്ലിക് എന്നിവിടങ്ങളിലേക്ക് കേന്ദ്ര പൊതുമേഖലാ സ്ഥാപനമായ എച്ച്എൽഎൽ ലൈഫ് കെയർ കയറ്റി അയക്കാൻ ഒരുങ്ങുന്നത്.

ഇവിടങ്ങളിൽ എച്ച്ഐവി എയ്ഡ്‌സ് രോഗം പ്രതിരോധിക്കാനുള്ള ആഗോള പദ്ധതിയുടെ ഭാഗമായി വികസ്വര രാജ്യങ്ങളിൽ ഗുണനിലവാരമുള്ള മരുന്നുകളും മറ്റും വിതരണം ചെയ്യുന്ന ഐഡിഎ എന്ന സ്ഥാപനം വഴിയാണ് എച്ച്എൽഎല്ലിന് കരാർ ലഭിച്ചത്.

റബ്ബർ ഉപയോഗിച്ചുള്ള സ്ത്രീകളുടെ ഗര്‍ഭനിരോധന ഉറകൾ എച്ച്എൽഎൽ സ്വയം വികസിപ്പിച്ചെടുത്തതാണ്. 25 ദശലക്ഷം ഉറകൾ ഇത്തരത്തിൽ പ്രതിവർഷം നിർമിക്കാൻ ശേഷിയുള്ള നിര്‍മാണശാലയാണ് എച്ചഎൽഎല്ലിനുള്ളത്.