മറിയം ആനന്ദാശ്രു പൊഴിച്ചു; ദുബായ് ഭരണാധികാരി ഒപ്പിയെടുത്തു

ദുബായ് ഭരണാധികാരി ഷെയ്ഖ് മുഹമ്മദ് ബിൻ റാഷിദ് അൽ മക്തൂമിന്‍റെ നിരവധി ചിത്രങ്ങളും വീഡിയോകളും ഇതിനോടകം വൈറലായിട്ടുണ്ട്. ഇപ്പോഴിതാ അദ്ദേഹം ഒമ്പതു വയസ്സുള്ള മറിയം എന്ന കൊച്ചുസുന്ദരിയുടെ ആനന്ദാശ്രു ഒപ്പിയെടുക്കുന്ന ചിത്രങ്ങള്‍ ഫേസ്ബുക്കിലും ട്വിറ്ററിലും ശ്രദ്ധനേടിയിരിക്കുകയാണ്.


ഖലീജ് ടൈംസാണ് ഈ വാര്‍ത്ത റിപ്പോര്‍ട്ട് ചെയ്തിരിക്കുന്നത്. വേൾഡ് റീഡിങ് ചലഞ്ച് അവാർഡ് (ഒരു കോടി രൂപ ) നേടിയ 9വയസുകാരി മറിയം അംജുനാണ് പുരസ്കാരം ഏറ്റുവാങ്ങവേ ആനന്ദാശ്രു പൊഴിച്ചത്. ഇത് കണ്ട ദുബായ് ഭരണാധികാരി ഉടൻ അദ്ദേഹത്തിന്‍റെ ശിരോ വസ്ത്രം (ഗുത്ര) കൊണ്ട് മറിയത്തിന്‍റെ കണ്ണീര്‍ ഒപ്പിയെടുക്കുകയായിരുന്നു. 44 രാജ്യങ്ങളിൽ നിന്നായി ഒരുകോടിയിലേറെ കുട്ടികളെ മറികടന്നാണ് മറിയം വിജയിയായത്. മോറോക്കോ സ്വദേശിയാണ് മറിയം.

മത്സരത്തിന്‍റെ അവസാനം 5 ഫൈനലിസ്റ്റുകളാണ് ഉണ്ടായിരുന്നത്. ഇവരിൽ നിന്നാണ് കാണികളുടെ വോട്ടിംഗിന്‍റെ കൂടി പിൻബലത്തിൽ മറിയം വിജയിയായത്. മത്സരത്തിൽ പങ്കെടുത്ത ഓരോ കുട്ടിയും 50 പുസ്തകങ്ങള്‍ വീതമാണ് വായിച്ചിരുന്നത്. ഖലീജ് ടൈംസിന്‍റെ സീനിയർ ഫോട്ടോ ജേർണലിസ്റ്റും മലയാളിയുമായ ശിഹാബാണ് ഈ ചിത്രങ്ങള്‍ പകര്‍ത്തിയത്. വേദിയിൽ ദുബായ് ഭരണാധികാരിയോടു കൂടിയുള്ള മറിയത്തിന്‍റെ ചിത്രങ്ങള്‍ വൈറലായിരിക്കുകയാണ്.