വീരേന്ദ്രകുമാറിനെ 'കേന്ദ്രമന്ത്രിയാക്കി' ഇന്ത്യ ടുഡേ

തിരുവനന്തപുരം: സോഷ്യലിസ്റ്റ് ജനത ദൾ നേതാവ് എം.പി.വീരേന്ദ്രകുമാറിന്‍റെ ചിത്രം നൽകി ഇന്ത്യ ടുഡേ ചാനലിൽ നടത്തിയ ചർച്ച മലയാളീ പ്രേക്ഷകരെ ഞെട്ടിച്ചു. കടുത്ത സംഘപരിവാർ- ബിജെപി വിരോധിയായ വീരേന്ദ്രകുമാർ മോദി മന്ത്രിസഭ പുനഃസംഘടനയിൽ കേന്ദ്ര മന്ത്രിയാകുമെന്ന് കാണിച്ചായിരുന്നു ചർച്ച.ഇടതുമുന്നണിയിലേക്ക് വീരേന്ദ്രകുമാര്‍ അടുക്കുന്നുവെന്ന വാര്‍ത്തകള്‍ സജീവമാകുന്നതിനിടെയാണ് ഇന്ത്യാ ടുഡെയുടെ വക ചൂട് പിടിച്ച ചർച്ച അരങ്ങേറിയത്.

ഇന്ന് രാവിലെ സത്യപ്രതിജ്ഞ ചെയ്യുന്ന ഒമ്പത് മന്ത്രിമാരുടെയും ചിത്രങ്ങള്‍ കൊടുത്തു കൊണ്ട് മോദി മിഷന്‍ 2019, നയൻ ന്യു ഫേസസ് എന്ന ബ്രേക്കിങ്ങോടെയാണ് ഇന്ത്യാ ടുഡെയില്‍ ചര്‍ച്ച നടന്നത്. പുതിയ മന്ത്രിമാരുടെ ചിത്രങ്ങള്‍ കാണിക്കുന്ന കൂട്ടത്തിലാണ് ജെഡിയു കേരളഘടകം അധ്യക്ഷന്‍ എം.പി വീരേന്ദ്രകുമാറിനെ ഇന്ത്യാടുഡെ മന്ത്രിയാക്കിയത്.

നേരത്തെ മീഡിയവണ്‍ ചാനലിലെ ചര്‍ച്ചക്കിടയിൽ പുതിയ മന്ത്രിമാരുടെ പേരുകള്‍ സ്‌ക്രോള്‍ ചെയ്ത് പോയപ്പോള്‍ ചര്‍ച്ചയില്‍ ബിജെപിയെ പ്രതിനിധീകരിച്ച് പങ്കെടുത്തിരുന്ന അംഗവും വീരേന്ദ്രകുമാറിന്‍റെ പേര് കണ്ടപ്പോള്‍ ഈ വാർത്ത തെറ്റാണെന്ന് വ്യക്തമാക്കിയിരുന്നു. ബിജെപിയുമായി ചേര്‍ന്ന് ബിഹാറില്‍ നിതീഷ് കുമാര്‍ സര്‍ക്കാര്‍ ഉണ്ടാക്കിയതോടെ ജെഡിയു കേരളഘടകം അവർക്കൊപ്പം നിൽക്കില്ലെന്ന് വീരേന്ദ്രകുമാർ പ്രഖ്യാപിച്ചിരുന്നു. കേരളത്തിൽ ജെഡിയു ഇടതുമുന്നണിക്കൊപ്പം തിരിച്ചെത്തുന്നുമുള്ള അഭ്യൂഹങ്ങൾക്കിടെയാണ് ഇന്ത്യാ ടുഡെയുടെ ചർച്ച ഏവരെയും ഞെട്ടിച്ചത്.

India Today made Virendrakumar new cabinet minister

M P Virendrakumar was made new cabinet minister in India Today discussion