കടലുകള്‍ താണ്ടി തരിണി; പാറിപ്പറന്ന് മൂവര്‍ണ പതാക

സെപ്‍റ്റംബറില്‍ സമുദ്രത്തിലൂടെ ലോകം മുഴുവന്‍ ചുറ്റാനായിരുന്നു ഇന്ത്യന്‍ നാവികസേനയില്‍ നിന്നുള്ള ആറ് വനിതകള്‍ ഐഎൻഎസ്‍വി തിരിണി എന്ന യാത്രാബോട്ടില്‍ യാത്ര തുടങ്ങിയത്. കഴിഞ്ഞദിവസങ്ങളിലൊന്നില്‍ ഐഎന്‍എസ്‍വി തരിണി കേപ് ഹോണ്‍ എന്ന മുനമ്പ് മറികടന്നു. ഡ്രേക്ക് പാസേജ് എന്ന വിളിക്കുന്ന മേഖലയാണിത്. സമുദ്രത്തിലെ ഏറ്റവും ദുര്‍ഘടമായ പ്രദേശങ്ങളില്‍ ഒന്നാണിത്.

ദക്ഷിണ അമേരിക്കയിലാണ് ഇപ്പോള്‍ തരിണി ഉള്ളത്. ഫോള്‍ക്ക് ലാന്‍ഡ് ദ്വീപുകളിലൂടെ ബോട്ട് യാത്ര തുടരുകയാണ്. കേപ് ഹോണ്‍ കടന്നപ്പോള്‍ ഇന്ത്യന്‍ സംഘം ദേശീയപതാക ഉയര്‍ത്തിയാണ് സന്തോഷം പ്രകടിപ്പിച്ചത്.

പ്രധാനമന്ത്രി നരേന്ദ്ര മോദി തരിണി സംഘത്തെ അഭിനന്ദിച്ചു. ഗോവയില്‍ നിന്ന് സെപ്‍റ്റംബറില്‍ യാത്ര തുടങ്ങിയ തരിണി ഫ്ലാഗ് ഓഫ് ചെയ്‍തത് പ്രതിരോധവകുപ്പ് മന്ത്രി നിര്‍മ്മല സീതാരാമനാണ്. 56 അടി നീളമുള്ള തരിണി പൂര്‍ണമായും ഇന്ത്യയില്‍ നിര്‍മ്മിച്ച ജലയാനമാണ് എന്നതും പ്രത്യേകതയാണ്.

ലെഫ്‍റ്റനെന്‍റ് കമാൻഡര്‍ വര്‍ത്തിക ജോഷിയാണ് സംഘത്തെ നയിക്കുന്നത്. ഏപ്രിലില്‍ വീണ്ടും ഗോവയില്‍ യാത്ര സമാപിക്കും. മലയാളിയായ നാവികന്‍, അഭിലാഷ് ടോമി 2012ല്‍ ഒറ്റയ്ക്ക് ഇതേയാത്ര നടത്തിയിരുന്നു.