തെരുവിലാണ്, അന്തിയുറങ്ങാൻ വീടില്ലെന്ന് ജാക്കി ചാന്‍റെ മകൾ

അന്തിയുറങ്ങാൻ ഒരു വീടില്ലെന്നും തെരുവിലാണെന്നും പറഞ്ഞ് സഹായം അഭ്യർത്ഥിച്ച് കഴിഞ്ഞ ദിവസം രണ്ട് യുവതികൾ യൂട്യൂബിൽ വീഡിയോ അപ്‍ലോഡ് ചെയ്തിരുന്നു. വിഡിയോയിലെ യുവതികളെ തിരിച്ചറിഞ്ഞപ്പോൾ ആളുകളും ഒന്നമ്പരന്നു. ആക്ഷൻ ഹീറോ ജാക്കിചാന്‍റെ മകൾ എറ്റ ഇങ് ആണ് ഈ വീഡിയോയിൽ പ്രത്യക്ഷപ്പെട്ടത്.

ജാക്കി ചാന്‍റെ വിവാഹേതര ബന്ധത്തിൽ പിറന്ന മകളാണ് എറ്റ. മുൻ സൗന്ദര്യറാണി എലെയ്ൻ ഇങ്ങാണ് എറ്റയുടെ അമ്മ. ഇരുവരുടെയും എല്ലാ കാര്യങ്ങളും ജാക്കി ചാൻ ആയിരുന്നു നോക്കിയിരുന്നത്. എന്നാൽ എലെയിന്‍റെ ആഡംബര ജീവിതം ഇവരുടെ ബന്ധത്തിൽ വിള്ളലുണ്ടാക്കി. പതിനെട്ടുകാരിയായ എറ്റയാകട്ടെ സ്വവർഗാനുരാഗിയാണ്. പ്രിയ കൂട്ടുകാരിക്കൊപ്പമാണ് എറ്റ തെരുവിൽ കഴിയുന്നത്.




സ്വവർഗാനുരാഗത്തെ വീട്ടുകാരും സമൂഹവും എതിർത്തപ്പോൾ ആണ് ഞങ്ങൾക്ക് ഈ അവസ്ഥ വന്നത് എന്നാണ് എറ്റ വീഡിയോയിൽ വ്യക്തമാക്കിയിരിക്കുന്നത്. വീട്ടുകാർ ഈ ബന്ധം എതിർത്തപ്പോൾ സഹായത്തിനായി പൊലീസ് സ്റ്റേഷനുകളെയും ആശുപത്രികളെയും ട്രാൻസ്ജെൻഡർ വിഭാഗത്തെയും സമീപിച്ചിരുന്നു, ആരും തന്നെ സഹായത്തിനായി എത്തിയല്ലെന്നാണ് എറ്റ പറയുന്നത്.

ഇനിയെന്ത് ചെയ്യണമെന്ന് ഒരു ധാരണയുമില്ലാത്തതിനാലാണ് വീഡിയോ ഇറക്കിയതെന്നും എറ്റ പറയുന്നു. എന്നാൽ സംഭവത്തിൽ ജാക്കി ചാൻ ഒന്നും പ്രതികരിച്ചിട്ടില്ല.