ജീവനാംശമായി കിട്ടിയ 45 ലക്ഷവും സ്വച്ഛ് ഭാരതിന്; ശ്രദ്ധനേടി മേഘ

പല വിവാഹ മോചനങ്ങളും വാർത്തകൾ സൃഷ്ടിച്ചിട്ടുണ്ട്. എന്നാൽ ഇങ്ങനെയൊരു വിവാഹമോചനം വാർത്തകളിൽ ഇടംനേടുന്നത് ഇതാദ്യമായിട്ടായിരിക്കും. വിവാഹമോചനത്തിന്‍റെ ഭാഗമായി ലഭിച്ച ജീവനാംശ തുക മോദിക്ക് സംഭാവന ചെയ്ത് ജമ്മുവിലെ ദന്ത ഡോക്ടറായ മേഘ മഹാജൻ എന്ന 30 കാരി വാർത്താ പ്രാധാന്യം നേടിയിരിക്കുകയാണ്. പ്രധാന മന്ത്രി നരേന്ദ്ര മോദിയുടെ ഒരു കടുത്ത ആരാധിക കൂടിയാണ് മേഘ. അതുകൊണ്ട് തന്നെ ജീവനാംശ തുകയായി ലഭിച്ച 45ലക്ഷവും മോദിയെ ഏല്പിക്കാൻ സന്നദ്ധത കാട്ടിയിരിക്കുകയാണ് മേഘ. തന്നെ ഏറെ ആകർഷിച്ച സ്വച്ഛ ഭാരത് പദ്ധതിയിലേക്കാണ് മേഘ സംഭാവന ചെയ്യുന്നത്.

നീണ്ട ഏഴു വർഷത്തെ പോരാട്ടത്തിനു ശേഷം ലഭിച്ചതാണ് മേഘയ്ക്ക് ഈ തുക. ഭീമമായ തുക സ്വന്തമാക്കാതെ ഇന്ത്യയെ മാലിന്യമുക്തമാക്കുന്ന പദ്ധതിയിലേക്ക് സംഭാവന ചെയ്ത് സാമൂഹ്യമാധ്യമങ്ങളിൽ താരമായിരിക്കുകയാണ് മേഘ. വിവാഹമോചനത്തിൽ നിന്നും ലഭിക്കുന്ന തുക പല സ്ത്രീകളും സ്വന്തം ആവശ്യങ്ങൾക്ക് മാത്രം വിനിയോഗിക്കുന്നതായിട്ടെ ഇന്നുവരെ കണ്ടിട്ടുള്ളൂ. ഒരു സ്ത്രീക്ക് വേണ്ടത് ആദരവാണ് പണമല്ല എന്ന അഭിപ്രായമാണ് മേഘയ്ക്കുള്ളത്. തനിക്ക് ലഭിച്ച ജീവനാംശ തുക ചെലവഴിക്കാൻ ഇതിലും നല്ല മാർഗം വേറെയില്ലെന്നാണ് മേഘ പറയുന്നത്.