ജാപ്പനീസ് ദമ്പതികൾക്ക് തമിഴ്നാട്ടിൽ സ്വപ്ന വിവാഹം

തമിഴ് ആചാരപ്രകാരം വിവാഹം കഴിച്ച് വാർത്തയിൽ ഇടംതേടിയിരിക്കുകയാണ് ഈ ജാപ്പനീസ് ദമ്പതികൾ. ചിഹാരു ഒബാറ്റയും യൂറ്റോ നിനാഗയുമാണ് സ്വപ്ന വിവാഹം സാക്ഷാത്കരിക്കാനായി മധുരയിലെത്തിച്ചേർന്നത്. തമിഴ് സംസ്ക്കാരത്തോടുള്ള ഇഷ്ടമാണ് ഇങ്ങനെയൊരു വിവാഹത്തിന് ഈ ദമ്പതികളെ പ്രേരിപ്പിച്ചത്. ഇതിനായി ഇവർ സഞ്ചരിച്ചതാകട്ടെ 6400 കിലോമീറ്ററും. കഴിഞ്ഞ വർഷം ഏപ്രിലിൽ ടോക്യോയിൽ വച്ച് ഇരുവരുടെയും വിവാഹം നടന്നിരുന്നു. ലളിതമായ ചടങ്ങുകളോടെയായിരുന്നു വിവാഹം.



2014 മുതൽ തമിഴ്നാട്ടിൽ ലിംഗ്വിസ്റ്റിക് റിസേർച്ചിൽ പഠനം നടത്തുന്ന ഒബാറ്റയ്ക്ക് തമിഴ് സംസ്കാരം ഏറെ ഇഷ്ടപ്പെട്ടിരുന്നു. ആ ഒറ്റ കാരണത്താലാണ് ഒബാറ്റ തമിഴ് നാട്ടിലെത്തി വീണ്ടും വിവാഹിതയായത്. ഈ ആഗ്രഹം പൂർത്തീകരിക്കാൻ 27 വയസുകാരിയായ ഒബാറ്റ ജപ്പാനിൽ ജോലി ചെയ്യുന്ന മധുര സ്വദേശികളായ ദമ്പതികളെ സമീപിച്ചിരുന്നു. തുടർന്ന് വിനോദിനിയും ഭർത്താവ് വെങ്കിടേഷും ചേർന്ന് തമിഴ് ആചാരപ്രകാരം വിവാഹം കഴിക്കാനുള്ള എല്ലാ ഏർപ്പാടുകളും ഈ ദമ്പതികൾക്കായി ഒരുക്കി നൽകുകയായിരുന്നു.




വിവാഹത്തിന് വൻ ഒരുക്കങ്ങൾ തന്നെയാണ് ജാപ്പനീസ് ദമ്പതികൾക്കായി ഇവർ ഒരുക്കിയത്. തമിഴിൽ അച്ചടിച്ച കല്യാണക്കുറിയും തമിഴ് രീതിയിലുള്ള വസ്ത്രങ്ങളും വിവാഹത്തിന് വേണ്ടി ഒരുക്കി. ഒബാറ്റയ്ക്ക് തമിഴ് നന്നായി സംസാരിക്കാൻ കഴിയും. തമിഴ് സംസ്ക്കാരത്തോടുള്ള ജാപ്പനീസ് സംസ്ക്കാരത്തിനുള്ള സാദൃശ്യമാണ് തമിഴ് നാടിനോട് തന്നെ അടുപ്പിച്ചത് എന്നാണ് ഒബാറ്റ പറയുന്നത്.



ഒബാറ്റയുടെ ഭർത്താവ് നിനാഗയ്ക്കും തമിഴ് ആചാര പ്രകാരമുള്ള വിവാഹം വളരെയധികം ഇഷ്ടമായി. തമിഴ് താരങ്ങളായ വിജയുടെയും ധനുഷിന്‍റെ കടുത്ത ആരാധകനാണ് താനെന്നും അവരുടെ വേഷവിധാനങ്ങളാണ് പരമ്പരാഗത രീതിയിലുള്ള ഈ വസ്ത്രം ധരിക്കാൻ തന്നെ പ്രേരിപ്പിച്ചത് എന്നാണ് 31 കാരനായ നിനാഗ പറയുന്നത്.