വിദ്യാർഥികളെ കൊണ്ട് ശരീരം തിരുമ്മിച്ച് അധ്യാപകൻ: വീഡിയോ

റായ്‌പൂർ: വിദ്യാർഥികളെ കൊണ്ട് ശരീരം തിരുമ്മിച്ച അധ്യാപകനെ സസ്‌പെൻഡ് ചെയ്‌തു. ഛത്തീസ്‌ഗഡിലെ ജാഷ്‌പൂർ ജില്ലയിലെ സർക്കാർ സ്‌കൂളിലാണ് സംഭവം. വിദ്യാർഥികളെ കൊണ്ട് ശരീരം തിരുമ്മിക്കുന്ന വീഡിയോ പുറത്തുവന്നതോടെയാണ് അധ്യാപകൻ കുടുങ്ങിയത്.

അനൂപ് മിൻസ് എന്ന ഇംഗ്ലീഷ് അധ്യാപകനാണ് സ്‌റ്റാഫ് റൂമിലെത്തിയ കുട്ടികളോട് തന്റെ ശരീരം തിരുമ്മിക്കൊടുക്കാൻ ആവശ്യപ്പെട്ടത്. മൂന്ന് വിദ്യാർഥികൾ തറയിൽ കിടക്കുന്ന അധ്യാപകന്റെ ശരീരം തിരുമ്മിക്കൊടുക്കുന്നത് വീഡിയോയിൽ കാണാം. 20 ദിവസത്തോളം പഴക്കമുള്ള വീഡിയോയാണ്

വീഡിയോ സോഷ്യൽ മീഡിയയിൽ പ്രചരിച്ചതോടെ ജില്ലാ വിദ്യാഭ്യാസ ഓഫീസർ അന്വേഷണത്തിന് ഉത്തരവിടുകയും അധ്യാപകനെ സസ്‌പെൻഡ് ചെയ്യുകയും ചെയ്‌തു. എന്നാൽ തനിക്ക് സുഖമില്ലാത്തതിനാൽ വിദ്യാർഥികൾ തന്നെ മുൻകൈയ്യെടുത്ത് തിരുമ്മിക്കൊടുക്കുകയായിരുന്നു എന്നാണ് അധ്യാപകന്റെ വാദം.