80 ജീവനുകള്‍ കാത്ത ധീരന് ജെസിബിയുടെ ആദരം

എണ്‍പതോളം യാത്രക്കാരുമായി കൊക്കയിലേക്കു ചെരിഞ്ഞ തമിഴ്‍നാട് ട്രാന്‍സ്പോര്‍ട്ട് ബസിനെ മണ്ണുമാന്തിയന്ത്രത്തിന്‍റെ ഇരുമ്പുകൈയില്‍ രക്ഷിച്ച വടശ്ശേരിക്കര സ്വദേശി കപിലിന് ജെസിബിയുടെ ആദരം. ജെസിബിയുടെ ഇന്ത്യയിലെ ആസ്ഥാനമായ പൂനൈയില്‍ വച്ചു നടന്ന മീറ്റിംഗിലായിരുന്നു കപിലിനെ ആദരിച്ചത്.


'Kapil our everyday hero' എന്ന് അഭിസംബോധന ചെയ്തുകൊണ്ടാണ് പരിപാടിയിലേക്ക് കപിലിനെ ക്ഷണിച്ചത്. തനിക്കു സ്വപ്നം പോലും കാണാന്‍ കഴിയാത്ത വേദിയാണിത്. ഇവിടെ നില്‍ക്കാന്‍ കഴിഞ്ഞതില്‍ എന്നും ദൈവത്തോട് കടപ്പെട്ടിരിക്കുന്നുയെന്ന് ഇടറിയ കണ്ഠത്തോടെ കപില്‍ പറഞ്ഞു.


നന്മചെയ്യാന്‍ കിട്ടുന്ന ഒരവസരവും പാഴാക്കാതെ ഇനിയും വിനിയോഗിക്കുമെന്ന് നിറഞ്ഞകണ്ണുകളോടെ കപില്‍ പറഞ്ഞു.

ബോഡിനായ്ക്കന്നൂർ-രാജാക്കാട് റൂട്ടിൽ ഓടുന്ന ബസാണ് കൊക്കയിലേക്കു ചെരിഞ്ഞത്. ഒരു മണിക്കൂര്‍ നേരമാണ് 80 ജീവനുകള്‍ കപില്‍ താങ്ങി നിര്‍ത്തിയത്. ബസിലെ യാത്രക്കാരില്‍ പലരും കണ്ണുനീരണിഞ്ഞാണ് കപിലിനോടു നന്ദി പറഞ്ഞത്.