അമ്മക്കായി അമ്പത് വയസുള്ള, സസ്യഭുക്കായ, സുന്ദരനായ വരനെ തിരഞ്ഞ് മകൾ; വൈറലായി ആസ്‌തയുടെ ട്വീറ്റ്

ഒറ്റക്കായ അമ്മക്ക് വരനെ തേടി ഒരു മകൾ. ആസ്ത വർമയെന്ന നിയമവിദ്യാർഥിനിയാണ് അമ്മക്കായി 50 വയസുള്ള വരനെ തിരയുന്നതായി ട്വിറ്ററിലൂടെ അറിയിച്ചത്.

അമ്മക്കായി തേടുന്ന വരൻ എങ്ങനെയായിരിക്കണമെന്നും ആസ്ത ട്വിറ്ററിൽ വിശദമാക്കുന്നുണ്ട്. അമ്പത് വയസുള്ള, സുന്ദരനായിരിക്കണം വരൻ. സസ്യഭുക്കായിരിക്കണം, മദ്യപാനിയാകരുത്, ജോലിയുള്ള നല്ല നിലയിൽ ജീവിക്കുന്ന ആളായിരിക്കണം അമ്മയുടെ വരനെന്നും ആസ്ത ട്വീറ്റിൽ പറയുന്നു.

അമ്മയുടെ സന്തോഷത്തെ കുറിച്ച് ചിന്തിക്കണമെന്ന് തോന്നിയത് കൊണ്ടാണ് ഇപ്പോൾ ഇതിൽ ഇടപെടുന്നതെന്ന് ട്വിറ്ററിൽ ചിലരുടെ ചോദ്യങ്ങൾക്ക് മറുപടിയായി ആസ്ത പറഞ്ഞു. അസ്‌തയോടൊപ്പം അമ്മ നിൽക്കുന്ന ചിത്രവും ട്വിറ്ററിൽ പങ്കുവെച്ചിട്ടുണ്ട്.


കൈയ്യടികളോടെയാണ് ആസ്തയുടെ ട്വീറ്റിനെ സമൂഹമാധ്യമം സ്വാഗതം ചെയ്തത്. അതെ സമയം, ചിലർ ട്വീറ്റിനെ വിമർശിച്ചും രംഗത്തെത്തിയിട്ടുണ്ട്. ട്വിറ്ററാണോ വിവാഹാലോചന നടത്താനുള്ള സ്ഥലം എന്ന് ചോദിച്ചവരോട് ശാദി ഡോട്ട് കോമിലും ടിൻഡറിലും തിരഞ്ഞിട്ട് അമ്മക്ക് യോജിച്ച ആളെ കിട്ടിയില്ലെന്നും അതിനാലാണ് പരിചയമുള്ള സ്ഥലത്ത് ഇങ്ങനെയൊരു കുറിപ്പ് ഇട്ടതെന്നും ആസ്ത വ്യക്തമാക്കുന്നു.