ബോഡി ബിൽഡറാകാനുള്ള ആഗ്രഹം സഫലമാക്കി യൂറോപ്പാ ഭൗമിക്

മസിൽ പെരുപ്പിച്ചുള്ള ശരീരവും സിക്സ് പാക്കുമെല്ലാം ആണുങ്ങളുടെ മാത്രം കുത്തകയാണ് എന്നാണ് പൊതുവിലെ ധാരണ. എന്നാൽ യൂറോപ്പാ ഭൗമിക് ആ ധാരണയെല്ലാം മാറ്റിമറിച്ചിരിക്കുകയാണ്. കൗമാര പ്രായത്തിലുള്ള ഒരു പെൺകുട്ടിയോട് ആരാകണമെന്നാണ് ആഗ്രഹം എന്നു ചോദിച്ചാൽ, ഡോക്ടർ, എഞ്ചിനീയർ അതുമല്ലെങ്കിൽ ടീച്ചർ. ഒരു ബോഡി ബിൽഡർ ആകണമെന്ന് ഇതുവരെ ആരും പറഞ്ഞിട്ടുണ്ടാകില്ല.



യൂറോപ്പാ ഭൗമിക് എന്ന പതിനെട്ടുകാരി പതിവിൽ നിന്നും ഒന്ന് മാറി ചിന്തിച്ചു. ലോകം മുഴുവന്‍ അറിയപ്പെടുന്നൊരു ബോഡി ബില്‍ഡര്‍ ആകണമെന്നതായിരുന്നു ഈ പെൺകുട്ടിയുടെ ആഗ്രഹം. മാതാപിതാക്കളുടെ പൂർണ പിന്തുണയും ഈ പെൺകുട്ടിക്ക് ലഭിച്ചു. സ്ത്രീകൾ അധികം കൈകടത്താത്ത മേഖലയായത് കൊണ്ട് തുടക്കത്തിൽ നല്ല ബുദ്ധിമുട്ട് അനുഭവിച്ചുവെന്നാണ് ഭൗമിക് പറയുന്നത്. എന്നാൽ കഠിന പ്രയത്നത്തിലൂടെ ബോഡി ബില്‍ഡിങ് ആണുങ്ങള്‍ക്കൾക്കു മാത്രമല്ല സ്ത്രീകൾക്കും സാധിക്കുമെന്ന് തെളിയിച്ചിരിക്കുകയാണ് ഈ പതിനെട്ടുകാരി.



പൊക്കം കുറവായതിനാൽ കുഞ്ഞുനാൾ തൊട്ടെ നിരവധി പരിഹാസങ്ങൾ കേൾക്കേണ്ടി വന്നിരുന്നു. ഇന്ന് താൻ അതിനെല്ലാം ഒരു മറുപടി നൽകിയിരിക്കുന്നു എന്നാണ് ഇന്ത്യയുടെ ഈ മസിൽ വുമൺ പറയുന്നത്. ഈവര്‍ഷം സൗത്ത് കൊറിയയിൽ നടന്ന ഏഷ്യൻ ബോഡി ബിൽഡിങ് ആൻഡ് ഫിസിക് സ്പോർട്സ് ചാമ്പ്യൻഷിപ്പില്‍ ലൈറ്റ് വെയ്റ്റ് വിഭാഗത്തിൽ വെള്ളി മെഡൽ ജേതാവായിരുന്നു യൂറോപ്പാ ഭൗമിക്. കഴിഞ്ഞ വർഷവും ഈ നേട്ടം ഭൗമികിനെ തേടിയെത്തിയിരുന്നു. അടുത്ത വർഷം സ്വർണം നേടാനുള്ള കഠിന പ്രയത്നത്തിലാണ് ഭൗമിക്.



അതിനുവേണ്ടിയുള്ള കഠിന പ്രയത്നവും ഡയറ്റിങും ഭൗമിക് ആരംഭിച്ച് കഴിഞ്ഞു. കാർബോ ഹൈഡ്രേറ്റ് കുറച്ച് പ്രോട്ടീൻ അടങ്ങിയ ഭക്ഷണം മാത്രമാണ് ഭൗമിക് കഴിക്കുന്നത്. ഈ മേഖലയിൽ മസിലുകളുടെ പ്രദർശനമാണ് നടക്കുന്നത്. ചർമ്മത്തിനടിയിലുള്ള കൊഴുപ്പ് കുറഞ്ഞാൽ മാത്രമെ മസിലുകൾ തെളിഞ്ഞ് കാണുകയുള്ളൂ. അതിനാൽ പ്രത്യേക രീതിയിലുള്ള ഡയറ്റാണ് പിന്തുടരുന്നത് എന്നാണ് ഭൗമിക് പറയുന്നത്.



ഇന്ന് ധാരാളം പെണ്‍കുട്ടികൾ തന്‍റെ ശിഷ്യത്വം സ്വീകരിച്ച് എത്തുന്നുണ്ട്. ഇത് സ്വന്തം വിജയമായി കാണുന്നുവെന്നും എല്ലാ പരിഹാസങ്ങൾക്കുമുള്ള പകരംവീട്ടൽ കൂടിയാണ് ഇതെന്നും ഭൗമിക് പറയുന്നു. സ്വന്തമായി ജിം തുടങ്ങുക എന്നതാണ് ഭൗമികിന്‍റെ അടുത്ത ലക്ഷ്യം.