​പ്ലസ്‍ടു അഡ്മിഷൻ കിട്ടിയില്ല; ലിജോ കൃഷിപ്പണിക്ക് ഇറങ്ങി

അഞ്ച് അലോട്ട്‌മെന്റ് വന്നിട്ടും അഡ്മിഷന്‍ ലഭിച്ചില്ലെങ്കില്‍ പ്ലസ് ടു കഴിഞ്ഞ വിദ്യാര്‍ഥി എന്ത് ചെയ്യും. വയലില്‍ ഇറങ്ങി കിളയ്ക്കുമോ? അങ്ങിനെ വയലില്‍ ഇറങ്ങി കൃഷിപ്പണിക്ക് തീരുമാനിച്ച തിരുവനന്തപുരം സ്വദേശി ലിജോ ജോയിയുടെ ഫെയ്‌സ് ബുക്ക് പോസ്റ്റ് വൈറല്‍ ആകുന്നു.

5 അലോട്ട്‌മെന്റ് കഴിഞ്ഞ ലിജോ ജോയ്ക്ക് പ്ലസ് ടുവിന് ലഭിച്ച മാര്‍ക്ക് 79.7 ശതമാനമാണ്. എന്നിട്ടും തുടര്‍ പഠനത്തിനു എവിടെയും പ്രവേശനം ലഭിച്ചില്ല. വട്ടിയൂര്‍ക്കാവ് വിഎച്ച്എസിലും , സെന്റ് ശാന്താള്‍ മലമുകള്‍ സ്‌കൂളിലും തുടര്‍ന്ന് തിരുവനന്തപുരം സെന്റ് ജോസഫ്‌സ് സ്‌കൂളിലും പഠനം കഴിഞ്ഞ ശേഷം തുടര്‍ പഠനത്തിനു പ്രവേശനമില്ലാത്ത അവസ്ഥ.

ഞാന്‍ ഇതാ വയലിലേക്ക് ഇറങ്ങുന്നു. കൃഷിപ്പണി നടത്താന്‍ പോകുന്നു. കൈക്കോട്ടുമായി ഫോട്ടോയ്ക്ക് മുന്‍പാകെ നില്‍ക്കുകയും, തുടര്‍ന്ന് വയലില്‍ കൃഷിപ്പണിയില്‍ ഏര്‍പ്പെടുകയും ചെയ്യുന്ന ഫോട്ടോകള്‍ ഫെയ്‌സ് ബുക്ക് പോസ്റ്റില്‍ ചെയ്യുകയും തന്റെ അവസ്ഥ വിവരിക്കുന്ന ഒരു ചെറു കുറിപ്പ് ഒപ്പം നല്‍കുകയും ചെയ്തതോടെയാണ് സോഷ്യല്‍ മീഡിയാ ശ്രദ്ധ ലിജോ ജോയ്ക്ക് മേല്‍ പതിഞ്ഞത്. "നമ്മുടെ വിദ്യാഭ്യാസ സമ്പ്രദായം ശരിയല്ല. അല്ലെങ്കില്‍പ്പിന്നെ കൂടെ പഠിച്ചവരൊക്കെ കോളേജില്‍ പോകുമ്പോള്‍ ഞാന്‍ ഈ കാട് കിളക്കേണ്ട അവസ്ഥ വരുമായിരുന്നോ??"


"79.7 % മാര്‍ക്ക് പ്ലസ് ടുവിന് മേടിച്ചിട്ടും തുടര്‍ പഠനത്തിനു അവസരം കിട്ടാത്ത അവസ്ഥയാണ് നേരിടുന്നത്". ഉള്ളു പൊള്ളിക്കുന്ന ഒരനുഭവമായാണ് ലിജോ ജോയ് കുറിക്കുന്നത്. "50% മാര്‍ക്ക് ഉള്ള എന്നാല്‍ ജാതിയില്‍ പിന്നോക്കം നില്‍ക്കുന്ന എന്റെ കൂട്ടുകാര്‍ക്ക് എവിടെ വേണമെങ്കിലും പ്രവേശനം ലഭിക്കും. തുടര്‍ പ്രവേശനത്തിനു ഓടിച്ചാടി നടന്നപ്പോള്‍ ഞാന്‍ മനസിലാക്കിയ നഗ്‌ന സത്യം മാത്രമാണിത്.

മറ്റൊന്ന് പ്രവേശനത്തിനുള്ള മാനദണ്ഡം പണമാണ്. ഈ രണ്ടു വിഭാഗത്തിലും താന്‍ പെടില്ല. എന്നാല്‍ തന്റെ മാനദണ്ഡം പ്ലസ് ടുവിന് ലഭിച്ച ഉയര്‍ന്ന മാര്‍ക്കാണ്. 79.7 % ശതമാനം. എന്നാല്‍ നിലവില്‍ അതുകൊണ്ട് പ്രയോജനം ഇല്ലാത്ത അവസ്ഥയാണ്. സാരമില്ല..

ആരോടും ദേഷ്യമില്ല, മണ്ണിന്റെ മണം ഞാന്‍ ആസ്വദിച്ച് തുടങ്ങുന്നു… പക്ഷെ ഒന്നോര്‍ക്കുക, നിങ്ങളെന്നെ_കര്‍ഷകനാക്കി; ഇനിയുള്ള തലമുറക്ക് സംവരണത്തിന്റെ ആവശ്യം ഉണ്ടോയെന്ന് ചിന്തിക്കുക". ഫെയ്‌സ് ബുക്ക് പോസ്റ്റ് ലിജോ ജോയ് ഇങ്ങിനെ അവസാനിപ്പിക്കുന്നു. 26000 ത്തോളം ലൈക്കുകളും, മൂവായിരത്തോളം പ്രതികരണങ്ങളും 7000 ത്തോളം ഷെയറുകളുമാണ് ലിജോ ജോയ്യുടെ ഫെയ്‌സ് ബുക്ക് കുറിപ്പിന് ലഭിക്കുന്നത്.


Lijo joy's fb post

lijo joy's fb post about plus two admission.