ഗാന്ധി ഒപ്പിട്ട അപൂര്‍വ ഫോട്ടോ ലേലം ചെയ്‍തത് 27 ലക്ഷം രൂപയ്ക്ക്

സ്വാതന്ത്ര്യ സമര സേനാനി മദന്‍ മോഹന്‍ മാളവ്യക്കൊപ്പം നില്‍ക്കുന്ന മഹാത്മ ഗാന്ധിയുടെ ഫോട്ടോ ലേലം ചെയ്‍തപ്പോള്‍ കിട്ടിയത് ഏകദേശം 27,17,599 രൂപ (41,806 ഡോളര്‍). അമേരിക്കയിലെ ബോസ്റ്റണിലുള്ള ആര്‍ആര്‍ ഓക്ഷന്‍ എന്ന സ്ഥാപനമാണ് ഗാന്ധിയുടെ കൈയ്യൊപ്പ് പതിഞ്ഞ ഈ വിന്‍റേജ് ഫോട്ടോ ലേലം ചെയ്‍തത്.

എം.കെ ഗാന്ധി എന്ന ഒപ്പാണ് ഫോട്ടോയിലുള്ളത്. 1931ല്‍ എടുത്തതാണ് ഈ ഫോട്ടോയെന്ന് ആര്‍ആര്‍ ഓക്ഷന്‍ വാര്‍ത്തക്കുറിപ്പില്‍ അറിയിച്ചു. ലണ്ടനില്‍ നടന്ന വട്ടമേശ സമ്മേളനത്തിന്‍റെ രണ്ടാംഭാഗത്തില്‍ പങ്കെടുക്കാന്‍ ഗാന്ധി എത്തിയപ്പോള്‍ മദന്‍മോഹനൊപ്പം നടക്കുന്നതാണ് ഫോട്ടോ.



ഗാന്ധിക്കൊപ്പം പ്രവര്‍ത്തിച്ച മാളവ്യ, നിസഹകരണ പ്രസ്ഥാനത്തിന്‍റെ വക്താക്കളില്‍ ഒരാളായിരുന്നു. ഇന്ത്യയുടെ സ്വാതന്ത്ര്യത്തിനായി വാദിച്ച പ്രധാനപ്പെട്ട വ്യക്തിയുമാണ് മാളവ്യ. ഇടതു കൈകൊണ്ട് ഗാന്ധി എഴുതിയിരുന്ന ഒരു കാലമുണ്ടായിരുന്നു. വലതു കൈയ്യുടെ തള്ളവിരല്‍ വേദനകാരണമായിരുന്നു ഇത്. ആ സമയത്ത് എടുത്ത ചിത്രമാണ് ലേലം ചെയ്‍തതെന്ന് ആര്‍ആര്‍ ഓക്ഷന്‍ പറയുന്നു.