ബംഗളുരു: കാര്യമൊക്കെ ശരി, കെഎസ്ആര്ടിസിയെ മലയാളികള് കണക്കിന് കളിയാക്കും. എന്നു കരുതി അതില് തൊട്ടു കളിക്കാന് വേറെ ആരെങ്കിലും വന്നാലുണ്ടല്ലോ, ആമസോണല്ല, ഏത് ടോപ്പ് എന്ഡ് സൈറ്റാണെങ്കിലും കേറി പൊങ്കാലയിടും മലയാളികള്. പണ്ട് സച്ചിനെ അറിയില്ലെന്നു പറഞ്ഞ ഷറപ്പോവയുടെ സോഷ്യല് മീഡിയ പേജില് ഇട്ട പൊങ്കാലയെ ഓര്മ്മിപ്പിക്കും വിധത്തിലാണ് ആമസോണിന്റെ സോഷ്യല് പേജുകളില് മലയാളികള് അമര്ഷം രേഖപ്പെടുത്തിയത്.
ഞങ്ങള് ഇന്ത്യക്കാര് സഹായിക്കാന് ഇഷ്ടപ്പെടുന്നു എന്ന കുറിപ്പോടെ ആളുകള് ബസ്സ് തള്ളുന്നതിന്റെ ചിത്രം ആമസോൺ ബംഗളുരുവില് പരസ്യമായി വെച്ചതാണ് ഈ കുഴപ്പത്തിനൊക്കെ കാരണം. ആ ബസ്സ് കെഎസ്ആര്ടിസി ബസ്സാണെന്ന തിരിച്ചറിവ് സോഷ്യല് മീഡിയയിലെ മലയാളികളെ ആകെ ദേഷ്യത്തിലാക്കി.
ഞങ്ങളുടെ കെഎസ്ആര്ടിസി ബസ്സിനെ അപമാനിക്കുന്നോ എന്ന തരത്തിലായിരുന്നു പിന്നീട് പോസ്റ്റുകള്. അബദ്ധം മനസ്സിലാക്കിയ ആമസോൺ ക്ഷമാപണവുമായി മുന്നോട്ട് വന്നിട്ടുണ്ട്. എന്നാൽ ഇപ്പോഴും ആമസോണിനെതിരെയുള്ള ട്രോളുകൾ സോഷ്യൽ മീഡിയയിൽ പ്രചരിക്കുന്നുണ്ട്.