ഡെന്മാ‍ര്‍ക്കിനോട് ഗ്രീൻലാൻഡ് തനിക്ക് തരുമോ എന്ന് ചോദിച്ച് യുവാവ്

4-5 റൗണ്ട് റം പറ്റിച്ച പണിയെക്കുറിച്ച് യുവാവിന്‍റെ പോസ്റ്റ് വൈറലാവുന്നു. തന്‍റെ 23 ാം വയസ്സില്‍ മദ്യലഹരിയില്‍ ഡെൻമാര്‍ക്ക് എന്ന രാജ്യത്തിനോട്, അവരുടെ അധീനതയിലുള്ള ഗ്രീൻലന്‍റ് തനിക്ക് തരുമോ എന്ന് ചോദിച്ച യുവാവ് സ്വപ്നത്തില്‍ പോലും കരുതാത്തതാണ് പിന്നീട് സംഭവിച്ചത്.

റമ്മിന് അഡിക്റ്റായ ജോ എന്ന യുവാവിനാണ് ബാറിലുണ്ടായിരുന്ന ഗ്ലോബ് കണ്ടപ്പോള്‍ ഒരു ആഗ്രഹമുണ്ടായത്. സ്വന്തമായി ഒരു രാജ്യം വേണം. ഗ്ലോബ് രണ്ട് കറക്ക് കറക്കി ജോ ഉറപ്പിച്ചു, ഗ്രീന്‍ലന്‍റ് മതി. കാശുണ്ടാക്കി വാങ്ങാനൊന്നും ഒക്കില്ല, എന്നാപ്പിന്നെ മെയില്‍ അയച്ച് നോക്കാം, എങ്ങാനും തന്നെങ്കിലോ.. രണ്ടും കല്‍പ്പിച്ച് ജോ ഡെന്‍മാര്‍ക്കിന് മെയില്‍ ചെയ്തു. അതോടെ ഉറങ്ങിപ്പോകുകയും ചെയ്തു.

പിറ്റേന്ന് ഒരു ഹാങ് ഓവറുമില്ലാതെ (ഒരു ഓര്‍മയും അവശേഷിക്കാതെ) ജോലിക്കു പോയ ജോ വൈകിട്ടാണ് ഡെൻമാര്‍ക്ക് വിദേശ കാര്യ മന്ത്രാലയത്തില്‍ നിന്നുള്ള മറുപടി മെയില്‍ കണ്ടത്. വലിയ സ്വപ്നത്തിനായി പ്രയത്നിക്കുന്നത് നല്ലതാണെന്ന അഭിനന്ദനത്തില്‍ തുടങ്ങിയ കത്തില്‍ വളരെ വിനയപൂര്‍വം ജോയുടെ അഭ്യര്‍ത്ഥന നിരസിക്കുകയാണെന്ന് ഡെൻമാര്‍ക്ക് മന്ത്രാലയം കുറിച്ചു.

അത് കൂടാതെ ഗ്രീന്‍ലന്‍റില്‍ അധ്യാപകന്‍റെ ഒഴിവുണ്ടെന്നും ആദ്യപടിയായി അതിന് ശ്രമിക്കൂ എന്നും അവര്‍ കുറിച്ചു. സ്വപ്നം ഉപേക്ഷിക്കരുതെന്നും ഒരു നാള്‍ സാധിക്കട്ടെ എന്നുകൂടി ആശംസിച്ചാണ് മറുപടി അവസാനിച്ചത്.

സംഭവം നടന്നിട്ട് മൂന്ന് വര്‍ഷമായെങ്കിലും ആ രണ്ട് മെയിലുകളും താൻ ഇപ്പോഴും ഫ്രെയിം ചെയ്ത് സൂക്ഷിച്ചിട്ടുണ്ടെന്നാണ് ജോ പറയുന്നത്. ജോയുടെ കഥ ബോര്‍ഡ് പാണ്ടയിലൂടെ ഒട്ടനവധി പേരാണ് വായിച്ചത്.

കടപ്പാട് Boredpanda.com

Young man mailed Denmark asking to borrow Greenland and they replied.