ചരമ പരസ്യം നൽകി അയാൾ അപ്രത്യക്ഷനായി

കണ്ണൂര്‍: പ്രമുഖ പത്രങ്ങളില്‍ ചരമ പരസ്യം നല്‍കിയശേഷം അപ്രത്യക്ഷനായി കണ്ണൂര്‍ സ്വദേശി. ലക്ഷങ്ങളുടെ പരസ്യമാണ് തളിപ്പറമ്പ് കുറ്റിക്കോല്‍ സ്വദേശിയായ ജോസഫ് മേലുക്കുന്നേല്‍ നൽകിയത്.

ജനനവും ജീവിതവും കുടുംബ പശ്ചാത്തലവുമെല്ലാം വിവരിക്കുന്നതാണ് ഉള്‍പ്പേജിലെ പരസ്യം. സ്വന്തമായി തയ്യാറാക്കിയ പരസ്യം ബ്യൂറോയിൽ നേരിട്ടാണ് ഏല്‍പ്പിച്ചത്. പിന്നീട് ഇദ്ദേഹത്തെ കാണാതാവുകയായിരുന്നു.

പത്രത്തില്‍ പരസ്യം വന്നതോടെ ഞെട്ടിയ ബന്ധുക്കളും നാട്ടുകാരും വീട്ടിലേക്ക് ഫോണ്‍ വിളിച്ചപ്പോഴാണ് സത്യാവസ്ഥ അറിയുന്നത്. കാണാതായ ജോസഫിനെ കണ്ടെത്താന്‍ പോലീസ് അന്വേഷണം ആരംഭിച്ചിട്ടുണ്ട്. തലയിൽ ട്യൂമറിന് ചികിത്സയിലായിരുന്നു എന്നാണ് പരസ്യത്തിൽ പറഞ്ഞിരിക്കുന്നത്. അതേക്കുറിച്ച് വീട്ടുകാർക്ക് യാതൊരു അറിവും ഇല്ല. ആർസിസിയിൽ ചികിത്സയിലായിരുന്നു എന്നും ജോസഫ് സ്വന്തം ചരമക്കുറിപ്പിൽ പറഞ്ഞിരുന്നു. എന്നാൽ ഈ പേരിൽ ഒരു രോഗി ചികിത്സതേടി എത്തിയിട്ടില്ലെന്ന് ആർസിസി വ്യക്തമാക്കി.