സ്ത്രീധനമായി കാര്‍ കിട്ടിയില്ല: ഭര്‍ത്താവ് യുവതിയെ വെടിവെച്ചുകൊന്നു

ഗാസിയാബാദ്: സ്ത്രീധനമായി ചോദിച്ച കാര്‍ കിട്ടാത്തതിനെ തുടര്‍ന്ന് ഭര്‍ത്താവ് ഭാര്യയെ വെടിവെച്ചുകൊന്നു. ഗാസിയാബാദിലെ ട്രോണിക്ക നഗരത്തിലാണ് സംഭവം. അലീഷ എന്ന യുവതിക്കാണ് സ്ത്രീധനത്തെ ചൊല്ലിയുള്ള തര്‍ക്കത്തില്‍ ജീവന്‍ നഷ്ടപ്പെട്ടത്.

മോമിന്‍ എന്ന ഷാരൂഖും അലീഷയും എട്ട് മാസം മുമ്പാണ് വിവാഹിതരായത്. അന്ന് മുതല്‍ ഷാരൂഖിന്‍റെ വീട്ടുകാര്‍ കാര്‍ ആവശ്യപ്പെട്ടുകൊണ്ടിരുന്നു. ഈ കഴിഞ്ഞ വ്യാഴാഴ്ച രാത്രി ഇതെ ചൊല്ലിയുണ്ടായ തര്‍ക്കത്തില്‍ ഷാരൂഖ് അലീഷയുടെ നേര്‍ക്ക് വടിവെക്കുകയായിരുന്നു.

എന്നാല്‍ ടെറസില്‍ നിന്ന് വീണാണ് അലീഷ മരിച്ചതെന്നായിരുന്നു ഭര്‍തൃവീട്ടുകാരുടെ പ്രചരണം. അലീഷയുടെ സഹോദരന്‍ സംശയം തോന്നി നല്‍കിയ പരാതിയിലാണ് കൊലപാതകമാണെന്ന് കണ്ടെത്തിയത്. സംഭവത്തില്‍ ഷാരൂഖ്, സഹോദരന്‍ ആസിഫ്, പിതാവ് ഖായും എന്നിവരെ പോലീസ് അറസ്റ്റ് ചെയ്തിട്ടുണ്ട്. ഷാരൂഖിന്‍റെ അമ്മയും സഹോദരിയും ഒളിവിലാണ്. അലീഷയുടെ മൃതദേഹം പോസ്റ്റുമാര്‍ട്ടത്തിന് അയച്ചു.