അല്ലിയിളം പൂവോ പാട്ടുകേട്ട് മനുഷ്യന്റെ മാറിൽ ചേർന്നുമയങ്ങിയൊരു ആന

അമ്മമാർ പാട്ടുപാടി ഉറക്കുന്നത് കാണാത്തവരുണ്ടോ. എത്ര ലാളിത്യംനിറഞ്ഞ കാഴ്ചയാണത്. അമ്മ മാറോടടുക്കി പിടിച്ചിരിക്കുന്ന കുഞ്ഞും അമ്മയോട് ചേർന്നുറങ്ങുന്ന കുഞ്ഞും സ്നേഹം നിറയ്ക്കുന്ന കാഴ്ചതന്നെയാണ്. എന്നാൽ ഒരു ആനയെ താരാട്ടുപാടി ഉറക്കിയെന്നു കേട്ടാലോ? വിശ്വസിക്കാൻ ഇത്തിരി പ്രയാസമാണല്ലേ.

യേശുദാസ് പാടിയ അല്ലിയിളം പൂവോ എന്നു തുടങ്ങുന്ന പാട്ടുപാടി ആനയെ ഉറക്കിയ ഒരു മലയാളിയാണ് ഇപ്പോൾ അന്താരാഷ്ട്ര മാധ്യമങ്ങളിൽവരെ താരമായിരിക്കുന്നത്. മംഗളം നേരുന്നു എന്ന സിനിമയിലേ ഗാനം പാടിക്കൊണ്ട് ആനയെ തഴുകിയുറക്കുന്ന ദൃശ്യങ്ങൾ സ്നേഹ പ്രകടനത്തിന്റെ കാഴ്ചതന്നെയാണ്.

ഉറങ്ങുന്ന ആനയോടു ചേർന്നുകിടന്നാണ് നമ്മുടെ പാട്ടുകാരൻ താരാട്ടുപാടുന്നത്. ലാളിത്യം ആഗ്രഹിക്കുന്ന കുഞ്ഞിനെപ്പോലെ ആനയുടെ കിടപ്പ്. നെറ്റിത്തടത്തിൽ തലോടി പാട്ടുകാരനും. ഏതായാലും രാജ്യാതിർത്തി കടന്ന് മലയാളിയുടെ താരാട്ടുപാട്ട് ഒരു ആഗോള സംഭവമായി മാറിയിരിക്കുകയാണ്.