കുടവയർ എന്നു കരുതി, ഒടുവിൽ അറുപത്തിമൂന്നുകാരന് സംഭവിച്ചത്

തിരക്കേറിയ നമ്മുടെ ജീവിതശൈലിക്കിടയിൽ ശരീരപരിപാലനത്തിന് സമയം കണ്ടെത്തുക എന്നത് വളരെ ബുദ്ധിമുട്ടേറിയൊരു കാര്യമാണ്. ശരീരത്തിലുണ്ടാകുന്ന ചെറിയ മാറ്റങ്ങൾ പോലും നമ്മൾ കണ്ടില്ലെന്നു നടിക്കാറുണ്ട്. എന്നാൽ ന്യൂജഴ്സി സ്വദേശിയായ കെവിൻ ഡാലിയയുടെ അനുഭവമറിഞ്ഞു കഴിഞ്ഞാൽ നിങ്ങൾ ഒരുനിമിഷമെങ്കിലും നിങ്ങളുടെ ശരീരത്തെ കുറിച്ചൊന്ന് ചിന്തിച്ച് പോകും.



അറുപത്തിമൂന്നുകാരനായ കെവിന് ചെറിയൊരു കുടവയർ ഉണ്ടായിരുന്നു. ബിയർ ബെല്ലിയെന്നായിരുന്നു ആദ്യം കരുതിയിരുന്നത്. ക്രമേണ വയറിന്‍റെ വലുപ്പവും ഭാരവും കൂടി വന്നു. അതോടെയാണ് കെവിൻ ചികിത്സ തേടിയെത്തിയത്. സിടി സ്കാൻ ചെയ്തപ്പോൾ കെവിന്‍റെ ശരീരത്തിൽ 13 കിലോ ഭാരമുള്ള ട്യൂമർ ഉള്ളതായി കണ്ടെത്തി.

ലിപ്പോസർകോമ എന്ന കാൻസറാണ് കെവിനെ ബാധിച്ചത്. പതിനഞ്ചു വർഷം വരെ കുടവയർ മാത്രമാണെന്ന് കരുതിയതാണ് ട്യൂമറായി മാറിയത്. ആറു മണിക്കൂർ നീണ്ട ശസ്ത്രക്രിയയിലൂടെയാണ് ട്യൂമർ നീക്കം ചെയ്തത്. ട്യൂമർ വൃക്കയിലേക്ക് ബാധിച്ചതിനാൽ കെവിന്‍റെ ഒരു വൃക്കയും നീക്കം ചെയ്യേണ്ടതായി വന്നു. ഇപ്പോഴെങ്കിലും ട്യൂമർ കണ്ടെത്താൻ കഴിഞ്ഞത് നന്നായി എന്നാണ് ഡോക്ടർമാർ പറയുന്നത്. കെവിന്‍റെ ജീവൻ വരെ അപഹരിച്ചേക്കാവുന്ന ട്യൂമറായിരുന്നു വയറിൽ വളർന്നുകൊണ്ടിരുന്നത്.