ഭക്ഷണം മൂന്നു വര്‍ഷം വരെ സൂക്ഷിച്ചു വെക്കാം: കണ്ടുപിടിത്തവുമായി പ്രൊഫസര്‍

മുംബൈ: ഭക്ഷണം മൂന്നു വര്‍ഷങ്ങള്‍ വരെ സൂക്ഷിച്ചു വെക്കാനുള്ള വിദ്യയുമായി മുംബൈ യൂണിവേഴ്സിറ്റി പ്രൊഫസര്‍. ഇഡലി, ഉപ്പുമാവ്, ദോക്ല പോലെയുള്ള ഭക്ഷണ സാധനങ്ങള്‍ പ്രിസര്‍വേറ്റീവുകള്‍ ഉപയോഗിക്കാതെ യാതൊരു വിധ രുചിവ്യത്യാസമോ പോഷകമൂല്യമാറ്റമോ കൂടാതെ സൂക്ഷിച്ചു വെക്കുന്നതിനുള്ള ഉപാധിയാണ് ഈ കണ്ടുപിടിത്തമെന്ന് മുംബൈ യൂണിവേഴ്സിറ്റിയിലെ ഫിസിക്സ് പ്രൊഫസര്‍ ഡോക്ടര്‍ വൈശാലി ബംബോലെ പറയുന്നു.

ഇലക്ട്രോണ്‍ ബീം റേഡിയേഷന്‍ ഉപയോഗിച്ചാണ് ഇത് സാധ്യമാക്കുന്നത്. പ്രകൃതി ദുരന്തങ്ങള്‍ ഉണ്ടാകുമ്പോഴും കൂടാതെ ബഹിരാകാശ സഞ്ചാരികള്‍, പട്ടാളക്കാര്‍ മുതലായവര്‍ക്കും ഏറെ ഉപകാരപ്പെടുന്ന കണ്ടുപിടിത്തമാകും ഇത്. കുറഞ്ഞ അളവില്‍ എണ്ണ, പ്രോട്ടീന്‍ എന്നിവ അടങ്ങിയിട്ടുള്ള ഭക്ഷണമാണ് പരീക്ഷണത്തിനായി തെരഞ്ഞെടുത്തത്.

ഇക്കഴിഞ്ഞ ദിവസം മൂന്നര വര്‍ഷം മുന്‍പേ സൂക്ഷിച്ചു വച്ച ഇഡലി തുറന്നു നോക്കിയപ്പോള്‍ അത് അപ്പോഴും പുതിയ ഭക്ഷണം പോലെ തന്നെയാണ് ഉണ്ടായിരുന്നത്. എല്ലാ ഭക്ഷണ സാധനങ്ങള്‍ക്കും അനുയോജ്യം ആണെങ്കിലും ഇഡലി, ഉപ്പുമാവ്, ദോക്ല എന്നീ മൂന്നു ഭക്ഷണ സാധനങ്ങള്‍ കൂടുതല്‍ മികച്ച ഫലം നല്‍കുമെന്ന് വൈശാലി പറയുന്നു. ശാസ്ത്ര ലോകം ഏറെ പ്രതീക്ഷയോടെ ഉറ്റു നോക്കുന്ന കണ്ടുപിടിത്തമാണ് ഇത്.