മരണത്തിൽ നിന്ന് ജീവിതത്തിലേക്ക് എത്തിയൊരു ചിത്രം

മരണത്തിന്റെ ഗന്ധമറിഞ്ഞ് ജീവിതത്തിലേക്ക് തിരിച്ചു വന്ന അല്‍ബേനിയയിലെ സിസ്റ്റര്‍ മാര്‍ജാന ലെഷി എന്ന 35 വയസുള്ള കന്യാസ്ത്രീയുടെ ഈ ചിത്രം സോഷ്യല്‍ മീഡിയയില്‍ വൈറലാകുന്നു. ബുധനാഴ്ച പുലര്‍ച്ചെ 3.30 തോടെ നടന്ന ഭൂകമ്പത്തില്‍ സിസ്റ്റര്‍ താമസിച്ചിരുന്ന കോണ്‍വെന്റിന്റെ ഭിത്തികള്‍ പൂര്‍ണ്ണമായും തകര്‍ന്നുവീണിരുന്നു. മരണത്തെ മുഖാമുഖം കണ്ട നിമിഷങ്ങള്‍ ആയിരുന്നു അതെന്ന് സിസ്റ്റര്‍ മാര്‍ജാന ഓര്‍മ്മിക്കുന്നു. മരണത്തെ മനസാല്‍ സ്വീകരിച്ചതിനു ശേഷമാണ് ദൈവദൂതനെ പോലെ ഒരാള്‍ എത്തുകയും സിസ്റ്ററിനെ മരണത്തില്‍ നിന്ന് കൈപിടിച്ചുയര്‍ത്തുകയും ചെയ്തത്. ഭൂകമ്പമുഖത്ത് നിന്നും സിസ്റ്റര്‍ സുഹൃത്തുകള്‍ക്ക് വിടവാങ്ങല്‍ സന്ദേശമയച്ചിരുന്നു.

ഈ ലോകത്തിലെ യാത്ര അവസാനിക്കുന്നു..വിട! എന്നായിരുന്നു സന്ദേശം.
വിശുദ്ധക്രൂശീകരണ ദേവാലയത്തിന് സമീപമുള്ള വൃദ്ധസദനത്തിലെ അന്തേവാസികളുടെ പരിചരണത്തിനുള്ള ചുമതലയിലായിരുന്നു സിസ്റ്റര്‍ മാര്‍ജാനയും കൂട്ടാളികളും. അപകടം നടന്നയുടനെ ഉറക്കെ നിലവിളിച്ചെങ്കിലും ആരും സഹായത്തിനെത്തിയില്ല. വീട്ടുകാര്‍ക്ക് ഈ സന്ദേശം അയക്കാന്‍ ഞാന്‍ മടിച്ചു. അതുതന്നെ എന്റെ പിതാവിന് കനത്ത ആഘാതം ഏല്‍പ്പിക്കും എന്ന് ഞാന്‍ ഭയപ്പെട്ടു. ഞാന്‍ മരണത്തിന് തയ്യാറെടുത്തു. അപകടത്തില്‍ നിന്ന് രക്ഷപെട്ട സിസ്റ്റര്‍ മാര്‍ജാന പിന്നീട് ലോകമാധ്യമങ്ങളോട് പ്രതികരിച്ചു.

അപ്രതീക്ഷമായിട്ടാണ് ഒരു യുവാവ് തന്റെ പേര് വിളിച്ചുക്കൊണ്ട് അന്വേഷിച്ചു എത്തുന്നതും തുടര്‍ന്ന് തന്നെ രക്ഷിക്കുന്നതും. അവശിഷ്ടങ്ങള്‍ക്കിടയില്‍ കുടുങ്ങിയ തന്നെ അയാള്‍ വലിച്ചുപുറത്തിട്ടു. അപ്പോഴും ഭൂകമ്പം അവസാനിച്ചിരുന്നില്ല. ജീവന്‍ തിരിച്ചുക്കിട്ടി എന്ന് സുഹൃത്തുകള്‍ക്കും സഹപ്രവര്‍ത്തകര്‍ക്കും സിസ്റ്റര്‍ മാര്‍ജിയാന തെരുവിലിരുന്നു ശാന്തമായി സന്ദേശങ്ങള്‍ അയക്കുന്ന ചിത്രമാണ് ഇപ്പോള്‍ സോഷ്യല്‍ മീഡിയയില്‍ വൈറലാകുന്നത്. സിസ്റ്റര്‍ മാര്‍ജിയാന അപകടത്തെ അതിജീവിച്ചെങ്കിലും ഒപ്പമുണ്ടായിരുന്നവരില്‍ ഒരാള്‍ മാത്രമാണ് രക്ഷപ്പെട്ടത്. ആ കെട്ടിടത്തില്‍ ഉണ്ടായിരുന്ന മറ്റു 7 പേരും ഭൂകമ്ബത്തില്‍ കൊല്ലപ്പെട്ടിരുന്നു.മാസിമോ പെര്‍ക്കോസി എന്ന ഫോട്ടോഗ്രഫറാണ് ഈ ചിത്രം പകര്‍ത്തിയിട്ടുള്ളത്.