എപ്പോഴും ഗൂഗിൾ മാപ്പാണ് നമ്മളെ പറ്റിക്കാറ്, എന്നാൽ ഗൂഗിൾ മാപ്പിന് ഒരു പണി കൊടുത്താലോ?

നമുക്കൊക്കെയും പണി തരുന്ന ഗൂഗിൾ മാപ്പിന് തിരിച്ച് പണി കൊടുത്താലെങ്ങനെയിരിക്കും. അത്തരത്തിലൊരു വീഡിയോയാണ് ഇപ്പോൾ സമൂഹ മാധ്യമങ്ങളിൽ വൈറലാകുന്നത്. സംഭവം വേറൊന്നുമല്ല, 99 മൊബൈൽ ഫോണുകൾ ഉപയോഗിച്ച് ഗൂഗിൾ മാപ്പിലെ ഡാറ്റകൾ തെറ്റിച്ചിരിക്കുകയാണ്. സൈമൺ വെക്കറ്റ് എന്ന ബെർലിൻ സ്വദേശിയാണ് ഇത്തരത്തിൽ 99 സ്മാർട് ഫോണുകൾ ഉപയോഗിച്ച് ഗൂഗിൾ മാപ്പിൽ വ്യാജ ട്രാഫിക്ക് ഉണ്ടാക്കിയത്.

സംഭവം എന്താണെന്ന് വെച്ചാൽ ഗൂഗിൾ മാപ്പിൽ ട്രാഫികും മറ്റും കാണിക്കുന്നത് അവിടെയുള്ളവരുടെ ഫോൺ ലൊക്കേഷനുകൾ അനുസരിച്ചായിരിക്കും. പല ഫോണുകൾ ഒരേ സ്ഥലത്ത് കുടുങ്ങിക്കിടക്കുമ്പോഴാണ് ഹെവി ട്രാഫിക്കാണെന്ന് ഗൂഗിൾ മാപ്പിൽ കാണിക്കുന്നത്. ഫോൺ ലൊക്കേഷൻ നോക്കിയാണ് ഗൂഗിൾ മാപ്പും പ്രവർത്തിക്കുന്നതെന്ന് ചുരുക്കം. അത് കൊണ്ട് തന്നെയാണ് സൈമൺ 99 ഫോണുകളുമായി വ്യാജ ട്രാഫിക് ഉണ്ടാക്കാൻ തെരുവിലിറങ്ങിയത്.

ബെർലിനിലെ ഗൂഗിൾ ഓഫീസിന് പുറത്തുള്ള ഒഴിഞ്ഞ സ്ട്രീറ്റാണ് ഇതിനായി സൈമൺ തെരഞ്ഞെടുത്തത്. 99 ഫോണുകളും ഒരു ട്രോളിയിലാക്കി സൈമൺ പതിയെ നടന്നു നീങ്ങാൻ തുടങ്ങി. എന്നാൽ ആ സമയത്ത് വഴിയോരങ്ങളിൽ യാതൊരു ട്രാഫികും ഉണ്ടായിരുന്നില്ല. എന്നാൽ സൈമണിന്റെ 99 മൊബൈലുകളിൽ നിന്നുള്ള സിഗ്നലുകൾ ഗൂഗിൾ മാപ്പിലെത്തുമ്പോൾ സ്ഥലത്ത് ഹെവി ട്രാഫിക്കായി കാണിക്കാനും തുടങ്ങി. ഇടയ്ക്കിടെ വേഗത കൂട്ടിയും കുറച്ചും സൈമൺ നടക്കുന്നതും വീഡിയോയിൽ കാണാം.

'നോവറിയാതെ': ഈ കുഞ്ഞിളം പുഞ്ചിരിക്ക് മുമ്പിൽ എല്ലാം മറന്നു പോകും...

ഗൂഗിൾ മാപ്പിന് കിട്ടിയ പണിയിൽ സോഷ്യൽ മീഡിയ മൊത്തം ചിരിക്കുകയാണ്. തങ്ങൾക്ക് പണി തരുന്ന ഗൂഗിൾ മാപ്പിന് പണി കൊടുത്ത സൈമണെ പ്രശംസിച്ചും ഒരുപാട് പേർ രംഗത്ത് വന്നിട്ടുണ്ട്. എന്നാൽ വീഡിയോ പങ്കുവെച്ചതിന് ശേഷം മറ്റുള്ള വിവരങ്ങളൊന്നും സൈമൺ പങ്കുവെച്ചിട്ടില്ല. ഈ വീഡിയോ ഇപ്പോൾ സമൂഹ മാധ്യമങ്ങളിൽ നിറഞ്ഞു നിൽക്കുകയാണ്. വീഡിയോ പലരും ഷെയർ ചെയ്യുന്നുണ്ട്. പലതരത്തിലുള്ള കമന്റുകളും ഇതിന് താഴെ വരുന്നുണ്ട്. പലരും തങ്ങളെ പലപ്പോഴായി പെരുവഴിയിലാക്കിയ ഗൂഗിളിന് പണി കിട്ടയതിൽ സന്തോഷവാന്മാരാണ്.