സ്വന്തം കുഞ്ഞിന് മുലയൂട്ടി താരമായി ഒരച്ഛൻ

മുലയൂട്ടൽ അമ്മമാരുടെ മാത്രം കുത്തകയല്ലെന്ന് തെളിയിച്ചിരിക്കുകയാണ് ഈ അച്ഛൻ. സ്വന്തം കുഞ്ഞിനെ മുലയൂട്ടി കൊണ്ട് മാക്സാ മില്ല്യൻ ഫേസ്ബുക്കിൽ പങ്കുവെച്ച ചിത്രങ്ങൾ ഇപ്പോൾ വൈറലാവുകയാണ്. പ്രസവത്തിനായി ഭാര്യയേയും കൊണ്ട് ആശുപ്ത്രിയിലേക്ക് പോകുമ്പോൾ മില്ല്യൻ ഒരിക്കലും കരുതികാണില്ല തന്നെ കാത്തിരിക്കുന്ന പുത്തൻ നിയോഗങ്ങളെ പറ്റി. ഇപ്പോൾ ജീവിതത്തിലെ മറക്കാനാകാത്ത അനുഭവങ്ങളിലൂടെ കടന്നുപോവുകയാണ് മില്ല്യൻ.

മാക്സാ മില്ല്യനും ഭാര്യ ഏപ്രിൽ ന്യൂബൗറിനും ജൂൺ 26 നാണ് പെൺകുഞ്ഞ് പിറന്നത്. കാത്തിരുന്ന് കിട്ടിയ കൺമണിയെ കൺകുളിർക്കെ കണ്ട് ഇരുവരും സന്തോഷം പങ്കിട്ടു. എന്നാൽ ആ സന്തോഷം അധികം നീണ്ടുനിന്നില്ല. പ്രസവത്തെ തുടർന്ന് ഏപ്രിലിന് സാരമായ ചില ആരോഗ്യ പ്രശ്നങ്ങളുണ്ടായി. തുടർന്ന് ഇവരെ തീവ്രപരിചരണ വിഭാഗത്തിലേക്ക് മാറ്റി. ഏപ്രിലിന് കുഞ്ഞിനെ മുലയൂട്ടാൻ പറ്റാത്ത സാഹചര്യം വന്നു. കുഞ്ഞിന്‍റെ പൂർണ ഉത്തരവാദിത്വം മില്ല്യന്‍റെ കൈകളിലായി.

അവൾക്ക് റോസ്‍ലി എന്ന പേരും വിളിച്ചു. കുഞ്ഞിന് അമ്മയുടെ മുലപ്പാൽ നൽകാൻ കഴിയാതെ വന്നപ്പോൾ കുപ്പിപ്പാൽ നൽകാമെന്ന് തീരുമാനിച്ചു. എന്നാൽ തന്‍റെ പൊന്നോമനയ്ക്ക് മുലകുടി അനുഭവം ലഭിക്കില്ലല്ലോ എന്ന ചിന്ത ഈ അച്ഛനെ വല്ലാതെ അലട്ടി. തന്‍റെ മാറോട് ചേർത്ത് താൻ തന്നെ മകൾക്ക് പാൽ നൽകുമെന്ന് ഈ അച്ഛൻ തീരുമാനിച്ചു. അങ്ങനെ നഴ്സിന്‍റെ സഹായത്തോടെ മില്ല്യൻ കുഞ്ഞിന് പാൽ കൊടുത്തു.

ഒരു ട്യൂബ് വഴി സിറിഞ്ചുമായി ഘടിപ്പിച്ച പ്ലാസ്റ്റിക് നിപ്പിൾ മില്ല്യന്‍റെ മാറിൽ ഘടിപ്പിച്ചു. എന്നിട്ട് മില്ല്യൻ അവളെ മാറോട് ചേർത്ത് പാൽ നൽകി. മില്ല്യൻ ഈ ചിത്രങ്ങൾ ഫേസ്ബുക്കിൽ പങ്കുവെച്ചതോടെ ലക്ഷക്കണക്കിനാളുകളാണ് ചിത്രം ഏറ്റെടുത്തത്. മാത്രമല്ല പല ലോക മാധ്യമങ്ങളും ഇത് വാർത്തയാക്കുകയും ചെയ്തു.