തവളകളുടെ ഹണിമൂൺ കേരളത്തിലോ; എഫ്.ബിയിൽ ട്രോള്‍മഴ

ലോകകപ്പ് കാലത്ത് ട്രോളന്മാർ നെയ്മറിന്‍റെ വീഴ്ച ആഘോഷിച്ചാണ് കഞ്ഞികുടിച്ചതെങ്കിൽ കേരളത്തിൽ മഴ കോരിച്ചൊരിഞ്ഞതോടെ അവരുടെ ശ്രദ്ധ മഴയിലേക്കായി. മൺസൂണിനോടൊപ്പം ട്രോള്‍മഴയാണ് ഫേസ്ബുക്കിൽ പെയ്തൊഴിയാതെ വന്നുകൊണ്ടിരിക്കുന്നത്. മഴയോടൊപ്പം സ്കൂളുകള്‍ക്കും കോളേജുകള്‍ക്കും അടിക്കടി അവധി നൽകുന്ന കളക്ടർമാർ കൂടിയായതോടെ ട്രോളന്മാർക്ക് ട്രോളുകളൊരുക്കാനുള്ള ചേരുവകളെല്ലാമായി.

കേരളത്തിലെ പ്രൊഫഷണൽ കോളേജ് വിദ്യാർഥികളെ ഒഴിവാക്കി അവധി നൽകിയതിന് കളക്ട‍ർമാരെ കളിയാക്കിക്കൊണ്ടുള്ള ട്രോളുകളാണ് ആദ്യമെത്തിയത്. ഇതിനെക്കുറിച്ചുള്ള ട്രോളുകൾ സമൂഹ മാധ്യമങ്ങളിൽ തരംഗമായിരുന്നു. ഇതിനു പിന്നാലെയാണ് പ്രൊഫഷണൽ കോളേജുകൾക്ക് അവധി പ്രഖ്യാപിച്ചത്. ഇതോടെ കളക്ടർമാരെ അഭിനന്ദിച്ചുകൊണ്ടുള്ള ട്രോളുകളുമെത്തി.


പ്രൊഫഷണൽ കോളേജുകൾക്കുൾപ്പടെയുള്ള വിദ്യഭ്യാസ സ്ഥാപനങ്ങൾക്ക് കേരളത്തിലെ എട്ടു ജില്ലകളിലെ കളക്ടർമാർ അവധി പ്രഖ്യാപിച്ചു. ഏറെ നാളുകളായുള്ള ആവശ്യം യാഥാർത്ഥ്യമായതോടെ ‌ട്രോൾ പേമാരിയും തുടങ്ങി. ജില്ലാ കളക്ടര്‍മാരുടെ പേജുകൾ ലൈക്കുകളും കമന്റുകളും കൊണ്ടു നിറഞ്ഞു.

കളക്ടറു‌ടെ ഫോട്ടോ വീട്ടിൽ മാലയിട്ട് പൂജിക്കുന്ന വിദ്യാർഥിയേയും, അവധി ലഭിച്ചത് അറിഞ്ഞു ബോധം കെട്ടു വീഴുന്ന പ്രൊഫഷണൽ കോളേജ് വിദ്യാർഥിയേയുമൊക്കെ ട്രോളന്മാർ രസകരമായി അവതരിപ്പിച്ചിട്ടുണ്ട്. അവധി നൽകാത്ത മറ്റു ജില്ലകളിലെ കളക്ടർമാർക്കും ട്രോളോടുട്രോളാണ്.

ഇതുകൂടാതെ മഴയ്ക്കുവേണ്ടി ഉത്തർപ്രദേശിൽ നടന്ന തവളകല്ല്യാണവും ട്രോളുകളിൽ നിറഞ്ഞു. ഇനി അവർ അവിടെ വിവാഹവും കഴിഞ്ഞ് ഹണിമൂണിന് കേരളത്തിൽ വന്നുകൊണ്ടായിരിക്കുമോ ഇവിടെ ഇത്രയും മഴയെന്നൊക്കെയാണ് ആരേയും പ്രായഭേദമെന്യേ ചിരിപ്പിക്കുന്ന ട്രോളുകളുടെ പോക്ക്...