ഇരുമുടിക്കെട്ടില്‍ മരത്തൈകളുമായിട്ടാകണം യാത്ര; ശാരദക്കുട്ടി

ഇരുമുടിക്കെട്ടില്‍ മരത്തൈകളുമായിട്ടാകണം പെണ്ണുങ്ങളുടെ ശബരിമല യാത്രയെന്ന് എഴുത്തുകാരി ശാരദക്കുട്ടി. മരത്തൈകളുമായി തുടങ്ങണം പെണ്ണുങ്ങളുടെ ശബരിമല യാത്രയെന്നാണ് ശാരദക്കുട്ടി ഫേസ്ബുക്കില്‍ കുറിച്ചു

പോസ്റ്റിൻ്റെ പൂ‍‍ർണ്ണരൂപം

പെണ്ണുങ്ങള്‍ ശബരിമലക്കു പോകുന്നുവെങ്കില്‍ അവിടം കാടുപിടിപ്പിക്കുവാനാകട്ടെ ആ യാത്ര. ഇരുമുടിക്കെട്ടില്‍ മരത്തൈകളുമായി തുടങ്ങണം ആ യാത്ര. ഓരോ വര്‍ഷവും അവയെ ദര്‍ശിക്കാന്‍ കൂടിയാകണം മല കയറുന്നത്. പെണ്ണു പൂക്കുന്ന കാടായി മാറട്ടെ ശബരിമലയും പൂങ്കാവനവും പമ്പാതീരവും. ആരണ്യകിലെ യുഗളപ്രസാദനെപ്പോലെ, വനലക്ഷ്മിക്ക് ആഭരണങ്ങള്‍ ചാര്‍ത്താനാകട്ടെ ഓരോ മല കയറ്റവും. അങ്ങനെ കാടകങ്ങള്‍ സമൃദ്ധവും സമ്പന്നവുമാകട്ടെ. പെണ്ണുങ്ങള്‍ മലകയറിയാല്‍ ഉരുള്‍പൊട്ടലും ഭൂമികുലുക്കവും പ്രളയവും വനനാശവും അല്ല ഉണ്ടാവുക എന്നത് തെളിയിക്കാന്‍ കഴിയും ഇതിലൂടെ..

.അവിടെ കയറാനുള്ള വലിയ അവകാശമാണ് കിട്ടിയത്. കിട്ടിയ അവകാശങ്ങള്‍ എങ്ങനെ ക്രിയാത്മകമായി, ഭൂസൗഹാര്‍ദ്ദപരമായി ഉപയോഗിക്കുമെന്നതിന് ഓരോരുത്തര്‍ക്കും അവരവരുടേതായ പാOങ്ങളും മാതൃകകളും ഉണ്ടാകണം .ഓരോ വ്യക്തിയും ഓരോ വര്‍ഷവും ഓരോ തൈ നടുക എന്നത് ഒരു പുതിയ ആചാരവും നാളത്തെ ശാസ്ത്രവുമാകട്ടെ.