ചൈനയിൽ അപൂർവ്വ മഴ; പെയ്തിറങ്ങിയത് കടൽ മത്സ്യങ്ങൾ

ചൈനയിലെ തീരദേശ നിവാസികൾ ആ കാഴ്ച കണ്ട് സ്തംഭരായി നിന്നു. കാണുന്ന കാഴ്ച സത്യമാണോ അതോ സ്വപ്നമാണോ എന്നു തിരിച്ചറിയാനാകാതെ ആളുകൾ പരിഭ്രമിച്ചു. ആർത്തുപെയ്യുന്ന മഴയ്ക്കൊപ്പം പെയ്തിറങ്ങിയത് നക്ഷത്ര മത്സ്യങ്ങൾ, നീരാളികൾ, ചെമ്മിൻ, ഞണ്ട്, കടൽപ്പന്നി തുടങ്ങിയ കടൽ ജന്തുക്കൾ. ഇടയ്ക്കിടെ ചെറു മീനുകളും പെയ്തിറങ്ങി. ഭാരമേറിയ നീരാളികൾ വീണ് പലരുടെയും കാറിന്‍റെ ഗ്ലാസ് തവിടുപൊടിയായി.

കഴിഞ്ഞ കുറച്ചു ദിവസങ്ങളായി ചൈനയിൽ കനത്ത മഴ തുടരുകയാണ്. എന്തു പ്രതിഭാസമാണെന്ന് മനസിലാക്കാൻ ചൈനയിലെ കാലാവസ്ഥാ വിദഗ്ദ്ധർക്ക് സാധിച്ചിട്ടില്ല. ശക്തമായ ന്യൂനമർദ്ദത്തെ തുടർന്ന് കടൽജീവികൾ ആകാശത്തേക്ക് വലിച്ചെടുക്കപ്പെടുകയും മഴയ്ക്കൊപ്പം അവ താഴേക്ക് പതിച്ചതാകാം എന്നാണ് നിലവിലെ അനുമാനം.

കഴിഞ്ഞ വർഷം മെസ്കിക്കൻ തീരപ്രദേശങ്ങളിലും സമാനമായ സംഭവമുണ്ടായിരുന്നു. കനത്ത മഴയിലും കൊടുങ്കാറ്റിലും പെയ്തിറങ്ങിയത് ചെറുതും വലുതുമായ മത്സ്യങ്ങളായിരുന്നു.