​നടി, വിദ്യാർഥി, തട്ടുകടക്കാരി സ്നേഹ ഒരു സംഭവമാണ്...

എറണാകുളം മഹാരാജാസില്‍ ബിരുദാനന്തര ബിരുദ വിദ്യാര്‍ഥിനിയാണ് സ്നേഹ ആർ.വി നായർ. പക്ഷേ അതോടൊപ്പം ഒരു നടിയും തട്ടുകടക്കാരിയും കൂടിയാണ്. കൂടാതെ കോളേജിൽ കെ.എസ്.യു. നേതാവും. നാട് ഹരിപ്പാടാണ്. അവിടെ വണ്ടിയിറങ്ങി കഴിയുമ്പോള്‍ കോളേജ് വിദ്യാർഥിയിൽനിന്ന് തട്ടുകടക്കാരിയിലേക്ക് സ്നേഹ വേഷം മാറും. പിന്നെ, വഴിയരികിലെ തട്ടുകടക്കാരിയാണ്. ഇത് ജീവിക്കാനുളള വേഷമാണ്. ഇടയ്ക്ക് സിനിമയിലും സീരിയലുകളിലും കോമഡി പരിപാടികളിലുമെല്ലാം അഭിനയിച്ചിട്ടുണ്ട്. ജീവിത പ്രാരാബ്ധങ്ങള്‍ക്കിടയിലും കലയോടുളള ഇഷ്ടം കൈവിടാനും സ്നേഹ തയ്യാറല്ല.



ഹരിപ്പാട് സുബ്രഹ്മണ്യസ്വാമി ക്ഷേത്രനടയിലാണ് സ്നേഹയുടെ തട്ടുകട.
കോളേജില്‍ പോകുമ്പോള്‍ അമ്മ വിജയമ്മ കട നോക്കും. ഹരിപ്പാട് അമ്പലത്തിലെ വിശേഷദിവസങ്ങളില്‍ സ്നേഹ പഠനത്തിന് അവധികൊടുക്കും. കച്ചവടം കൂടുതല്‍ കിട്ടുന്ന ദിവസങ്ങളാണത്. നാരങ്ങാവെള്ളവും മോരുംവെള്ളവും മിഠായിയുമൊക്കെയാണ് കച്ചവടം. അമ്മയ്ക്കും സ്നേഹയ്ക്കും ഭക്ഷണത്തിനുള്ള വകയുണ്ടാക്കണം. വീട്ടുവാടക കണ്ടെത്തണം. പിന്നെ പഠിക്കാനുള്ള ചെലവും.

അവധി ദിവസങ്ങളില്‍ സ്നേഹ മുഴുവന്‍ സമയവും കടയിലുണ്ടാകും. രാവിലെ 5.50 ന് എറണാകുളത്തിനുള്ള തീവണ്ടിയിലാണ് കോളേജില്‍ പോകുന്നത്. വൈകീട്ട് അഞ്ചുമണിയോടെ മടക്കം. നേരെ കടയിലേക്ക്.
അവിടെ ചായയുമായി അമ്മ കാത്തിരിക്കും. സ്നേഹ വന്നുകഴിഞ്ഞാല്‍ സാധനങ്ങള്‍ വാങ്ങാനുംമറ്റുമായി അമ്മ പോകും. രാത്രി എട്ടുവരെ പിന്നെ കട നോക്കും. പിന്നെ, അമ്മയ്ക്കൊപ്പം കുമാരപുരത്തെ വാടകവീട്ടിലേക്ക്.



പള്ളിപ്പാട് കൊടുന്താറ്റ് കോളനിയില്‍ നാല് സെന്റിലായിരുന്നു സ്നേഹയും കുടുംബവും താസമിച്ചിരുന്നത്. അച്ഛന്‍ രാജേന്ദ്രന്‍പിള്ള എട്ടുവര്‍ഷം മുമ്പ് മരിച്ചു. സ്നേഹ അന്ന് സ്കൂളില്‍ പഠിക്കുകയായിരുന്നു. പട്ടിണിയായിപ്പോയ നാളുകള്‍. എങ്ങനെയും പഠിക്കണമെന്ന് തീര്‍ച്ചപ്പെടുത്തിയ അവള്‍ അമ്മയ്ക്കൊപ്പം ഹരിപ്പാട് കോടതിക്ക് സമീപം തട്ടുകട തുടങ്ങി.



അവിടെനിന്ന് പഠിച്ച്‌ പ്ലസ്ടു വിജയിച്ചു. പിന്നീട് മഹാരാജാസില്‍ ബി.എ. പൊളിറ്റിക്സിന് ചേര്‍ന്നു. നല്ല മാര്‍ക്കോടെ വിജയം. ഇപ്പോള്‍ എം.എ. പൊളിറ്റിക്സ് ഒന്നാംവര്‍ഷമാണ്. കോളേജ് യൂണിയന്‍ തിരഞ്ഞെടുപ്പില്‍ വൈസ് ചെയര്‍പേഴ്സണായി അങ്കം കുറിച്ചുനോക്കിയെങ്കിലും ജയിച്ചില്ല. മമ്മൂട്ടി നായകനായ ബാല്യകാല സഖിയില്‍ കൊച്ചുത്രേസ്യയായി വേഷമിട്ടത് സ്നേഹയാണ്. ദിലീപ് നായകനായ വില്ലാളിവീരന്‍, ശേഷം, കഥാഭാഗം എന്നീ ചിത്രങ്ങളിലും അഭിനിയിച്ചു. അവയവദാനവുമായി ബന്ധപ്പെട്ട് ദൂരദര്‍ശനില്‍ പ്രദര്‍ശിപ്പിച്ച കൂടുമാറ്റം ഡോക്യുമെന്ററിയിലെ അഭിനയത്തിന് സംസ്ഥാന സര്‍ക്കാരിന്റെ പുരസ്കാരം ലഭിച്ചു. പ്രമുഖ ചാനലിലെ കോമഡി പരിപാടിയില്‍ ഒരുവര്‍ഷത്തോളം അഭിനയിച്ചിട്ടുമുണ്ട് സ്നേഹ.

Sneha's story:
meet this energetic degree student from maharajas, who earn while she learn.