സൈനികരുടെ കുടുംബത്തിന് സഹായം നല്‍കി കോടിയേരിക്ക് മറുപടി

കൊച്ചി: ഇന്ത്യന്‍ സൈന്യത്തിനെതിരായ സിപിഎം സംസ്ഥാന സെക്രട്ടറി കോടിയേരി ബാലകൃഷ്‍ണന്‍റെ പ്രസ്‍താവനയ്ക്ക് വ്യത്യസ്‍ത രീതിയിലുള്ള മറുപടിയുമായ ഫേസ്‍ബുക്കില്‍ ക്യാമ്പെയിന്‍. വീരമൃത്യു വരിച്ച സൈനികരുടെ കുടുംബത്തിന് സാമ്പത്തിക സഹായം നല്‍കിക്കൊണ്ടാണ് ഫേസ്‍ബുക്കില്‍ പലരും കോടിയേരിക്ക് മറുപടി നല്‍കുന്നത്.

വീരമൃത്യു വരിച്ച സൈനികരുടെ കുടുംബങ്ങള്‍ക്ക് സഹായത്തിനായി കേന്ദ്ര സര്‍ക്കാര്‍ തുടങ്ങിയ https://bharatkeveer.gov.in/ എന്ന വെബ്‍സൈറ്റ് വഴിയാണ് സഹായം നല്‍കുന്നത്. തുടര്‍ന്ന് പണം അടച്ചുകഴിയുമ്പോള്‍ വെബ്‍സൈറ്റില്‍നിന്ന് ലഭിക്കുന്ന രസീതിന്‍റെ ചിത്രം ഫേസ്‍ബുക്കില്‍ പോസ്‍റ്റ് ചെയ്‍തുകൊണ്ടാണ് സൈനികര്‍ക്ക് ആദരമര്‍പ്പിക്കുന്നത്. ചലഞ്ച് ഏറ്റെടുക്കാന്‍ മറ്റുള്ളവരെ ക്ഷണിക്കുകയും ചെയ്യുന്നുണ്ട് ചിലര്‍.

ഹാഷ് ടാഗുകളിലും ഓണ്‍ലൈന്‍ ചര്‍ച്ചകളിലും മാത്രം ഒതുങ്ങാതെ കോടിയേരിയുടെ പ്രസ്‍താവനയ്‍ക്ക് ദേശസ്‍നേഹംകൊണ്ട് മറുപടി നല്‍കുകയാണ് തങ്ങള്‍ എന്ന് ഇവര്‍ തങ്ങളുടെ ഫേസ്‍ബുക്ക് പോസ്‍റ്റിലൂടെ പറയുന്നു. ഇതിനകം നിരവധി പേര്‍ ക്യാമ്പെയിന്‍റെ ഭാഗമായി സൈനികരുടെ കുടുംബത്തിന് സഹായം നല്‍കിക്കഴിഞ്ഞു.

അഫ്‍സ്‍പ നിയമം നിലവില്‍ വന്നാല്‍ സൈന്യത്തിന് ആരെയും വെടിവെച്ചു കൊല്ലാമെന്നും സ്ത്രീകളെ ബലാത്സംഗം ചെയ്യാമെന്നുമാണ് കോടിയേരി കഴിഞ്ഞ ദിവസം പറഞ്ഞത്. ഇതിനെതിരെ ബിജെപി പ്രതിഷേധവുമായി രംഗത്തെത്തിയിരുന്നു.










Social media campaign against Kodiyeri's statement

Some people are protesting Kodiyeri Balakrishnan's statement against the Army by contributing money for the families of army men who have laid down their lives in the line of duty.