'പ്രളയ ദുരന്തത്തിന്‍റെ ഓർമ്മയ്ക്ക്'; വൈറലായി ഒരു ശിൽപം

ഇരുപതാം നൂറ്റാണ്ടിൽ കേരളം കണ്ട ഏറ്റവും വലിയ പ്രളയമായിരുന്നു ഇത്. ആ പ്രളയ ദുരന്തത്തിന്‍റെ ഓർമ്മയ്ക്കായി ഒരു ശിൽപം പണിതുയർത്തിയിരിക്കുകയാണ് പ്രശസ്ത ശിൽപിയായ ഡാവിഞ്ചി സുരേഷ്. തന്‍റെ ഫേസ്ബുക്ക് പേജിലൂടെയാണ് ഡാവിഞ്ചി ശിൽപത്തിന്‍റെ ചിത്രങ്ങൾ പങ്കുവെച്ചത്. നിമിഷം നേരങ്ങൾക്കുള്ളിൽ ചിത്രം സാമൂഹ്യ മാധ്യമങ്ങളിൽ വൈറലാവുകയും ചെയ്തു.

ഡാവിഞ്ചി സുരേഷിന്‍റെ ഫേസ്ബുക്ക് പോസ്റ്റ്,

''ഒരു ദുരന്തത്തിന്‍റെ ഓര്‍മ്മയ്ക്ക്‌. ഒട്ടേറെ പേരെ ദുരിതക്കയത്തിലാക്കിയ പ്രളയ ദുരന്തം. ജീവന്‍ രക്ഷാപ്രവര്‍ത്തനത്തില്‍ മുഖ്യ പങ്കു വഹിച്ചവരെ എങ്ങനെ മറക്കാനാകും. ഇന്ത്യന്‍ സൈന്യത്തിനും കടലിന്‍റെ മക്കള്‍ക്കും ഈ ശില്‍പം സമര്‍പ്പിക്കുന്നു''എന്ന കുറിപ്പിനൊപ്പമാണ് സുരേഷ് ശിൽപത്തിന്‍റെ ചിത്രങ്ങൾ പങ്കുവെച്ചത്.

കേരളത്തെ രക്ഷിക്കാനെത്തിയ മത്സ്യത്തൊഴിലാളികളും ഇന്ത്യൻസൈന്യവും ശിൽപത്തിൽ നിറഞ്ഞുനിൽക്കുന്നതായി കാണാം. ഒരുനേരത്തെ വിശപ്പടക്കാൻ ഭക്ഷണം മോഷ്ടിച്ചതിന് ആൾക്കൂട്ടം മർദ്ദിച്ചു കൊലപ്പെടുത്തിയ മധുവിന്‍റെ ശിൽപവും ഡാവിഞ്ചി നിർമിച്ചിരുന്നു. ആ ശിൽപവും സാമൂഹ്യ മാധ്യമങ്ങളിൽ വളരെയേറെ ശ്രദ്ധിക്കപ്പെട്ടിരുന്നു.